Шаңхәйдики йәр асти пойизи һадисисидин кейин, пуқраларда әнсирәш туйғулири күчәймәктә

Радиомиз зияритини қобул қилған хитай пуқралири, йеқиндин буян йәр асти пойиз йолида даим көрүлидиған түрлүк кашилилар сәвәбидин пойиз тохтап қелиш һадисисиниң көпийиватқанлиқини, өз бихәтәрликидин әнсирәштин башқа һөкүмәт даирилириниң мәсилини бир тәрәп қилмиғанлиқиға нарази икәнликини билдүрди.

Бу йил 9-айда шаңхәйдә йәр асти пойизи соқулуп кетиш һадисиси йүз берип, 300 дин артуқ адәм яриланғандин кейин, хитай даирилири вәқәниң бу йил 7-айда 40 адәмниң өлүшини кәлтүрүп чиқарған венҗу пойиз вәқәсигә охшашла, пойиз сигнал системисидики кашила сәвәбидин келип чиққанлиқини илгири сүргән иди.

Гәрчә вәқә йүз бәргили бир ай болған болсиму, әмма пуқраларниң шаңхәй йәр асти пойизиниң бихәтәрликидин әнсирәш туйғуси барғанчә күчәйгән. 20-Өктәбир күни радиомиз гуаңдуң бөлүминиң зияритини қобул қилған шаңхәйлик җин ханим өткән айда йүз бәргән йәр асти пойизи соқулуп кетиш һадисисидин кейин, йәр асти пойизида түрлүк кашилиларниң көпийиши йолучилардики вәһимини күчәйтиватқанлиқини билдүрди.

Җин ханим: йәр асти пойизи вогзалдин айрилип икки бекәт йүргәндин кейин, пойиз туюқсиз тохтап қалди. Әйни чағда пойизда йәнә нурғун йолучилар бар иди. Пойиз мана мушундақ икки бекәт оттурисида тохтап қалғандин кейин, пойиз ишики ечилмиди. Радиодин пойиз йолида кашила чиққанлиқи уқтурулуп, йолучиларниң сәврчанлиқ билән кашилиниң оңшилишини сақлиши тәләп қилинди. Йәр асти пойизида кашила көрүлүши бир икки қетимлиқ әһвал әмәс, һазир бундақ кашилилар барғанчә көпәймәктә.

Радиомиз мухбири шаңхәй йәр асти пойиз ширкитиниң қизиқ линийилик телефониға телефон қилип әһвал игилигинидә, телефонни алған хизмәтчи хадим мухбирға пойиз йолидики кашилиларниң техи оңшалмиғанлиқини билдүрди.

Хизмәтчи хадим: ширкитимиз йеқиндин буян көп кашила чиқиватқан 3- номурлуқ пойиз линийисидә пойизларниң меңиш сүритигә чәклимә қойди. Пойиз йолидики кашилилар йәнила йүз берип туруватиду. Һазир ширкитимиз бу кашилиларни түзитишкә тиришиватиду.

Радиомиз зияритини қобул қилған җав әпәндиму чаршәнбә күни 4-номурлуқ пойиз йоли линийисидиму, кашила чиққанлиқини билдүрүп мундақ деди: чаршәнбә күни 4-номурлуқ линийидики йәр асти пойизи җиншаҗаң йоли бекитигә кәлгинидә, туюқсиз пойиз ичидә көйүк пуриқи кәлди. Шу заман пойиз ичидә патипарақчилиқ йүз бәрди. Даириләр пуқралардики қорқунчини бесиш үчүн, вәқәдин кейин бу һадисини чүшәндүрүп, бу хил көйүк пуриқиниң пойиз чақи билән релисниң сүркилишидин келип чиққан нормал әһвал икәнликини испатлашқа тиришқан болсиму, әмма һазир пуқралар һөкүмәт даирилириниң сөзлиригә ишәнмәс болуп қалди.

Хәвәрләрдин мәлум болушичә, шаңхәй йәр асти пойиз йоли ширкити 18-өктәбир сәйшәнбә күни уқтуруш чиқирип, йеңидин ясиливатқан шаңхәй йәр асти йоли 12-линийисиниң бир бөләк қисмидики релисқа ятқузулған полат балдақлар аз болуп қалғанлиқи сезилгәндин кейин, сүпәт тәкшүргүчиләр тәрипидин қурулуш тохтитилип вәқәгә мунасивәтлик дәп қаралған 12 нәпәр хизмәтчигә җаза берилгәнликини уқтурған.

Җин ханим нөвәттә шаңхәй йәр асти пойиз йоли линийисидә көрүлүватқан кашилиларниң шаңхәй пуқралириниң һөкүмәт даирилиригә болған наразилиқини күчәйтиватқанлиқини билдүрүп мундақ деди: пуқралар нөвәттә һөкүмәт даирилириниң йүз бәргән барлиқ һадисиләрни бу җайда ишләватқан ишчиларға яки бир қисим хизмәтчилириниң хизмәттики бихәстәлики сәвәбидин йүз бәргән һадисиләр дәп, һөкүмәтниң вәқәдә үстигә елишқа тегишлик мәсулийитидин өзини қачурмақта. Әҗәба бу ишта мунасивәтлик тармақларниң һечқандақ мәсулийити йоқму? әмма һазирғичә даириләр шаңхәй йәр асти пойиз йолида йүз бәргән пойиз соқулуп кетиш вәқәси һәм ундин кейин үзлүксиз йүз бериватқан кашилилар һәққидә һечқачан өзлириниң мәсулийити барлиқини етирап қилғини йоқ.

Хитай тор бекәтлиридә йезилған бу һәқтики инкасларда, нөвәттә хитайдики парихорлуқ, хиянәтчилик илләтлириниң хитай төмүрйол системисида әвҗ алғанлиқи, һөкүмәт даирилириниң төмүрйол қурулушидики материяллардинму хиянәт қилип хәлқниң һаяти билән кари болмайватқанлиқи тәнқидләнмәктә.