Yene bir qabiliyetlik yash karxanichining qolgha élinishi ghulghula qozghidi

Istansimizgha bu heqte inkas qilghuchilar muhemmed élining diyanetlik, qabiliyetlik, ilghar pikirlik, muhimi milletperwer bir ülgilik karxanichi ikenlikini, uning tuyuqsiz jinayetchige aylinip qélishining Uyghurlar arisida guman qozghawatqanliqini bildürüshmekte.

Özini xitay ölkiside soda qiliwatqan bir Uyghur dep tonushturghan biri, yéqinda istansimiz bilen alaqiliship, shangxey qiran soda cheklik shirkitining bash diréktori muhemmed éli osmanning xitay da'iriliri teripidin türlük jinayetler artilip tuyuqsiz tutqun qilin'ghanliqini ashkarilidi hemde muhemmed élidek yétishken, qabiliyetlik, toghra yolda igilik tikligüchi Uyghurlarning tunji qétim mushundaq jinayetler artilip weyran qilinishi emeslikini eskertti, chünki bundin ilgiri Uyghur élidiki gülyürek shirkitining diréktorimu aldamchiliq jinayiti bilen qolgha élin'ghan idi.

Bu uchurdin kéyin, shangxey qiran shirkiti we muhemmed'eli osman heqqidiki izdinishlirimizdin melum boldiki, yeken nahiyilik jama'et xewpsizlik idarisi saqchiliri uni 2012-yili 7-awghust jinayet gumandari süpitide tutup-6 séntebirde resmiy qolgha alghan, shangxeydiki qiran soda cheklik shirkiti we ürümchi,yekendiki tarmaq shirketliri taqalghan bolsimu, bu xewer téxi ötken hepte bir qisim Uyghur tor betliride peyda bolghan hemde téz arida tordashlar arisida ghulghula peyda qilghan.

Muhemmed éli osmanning shexsi arxipigha da'ir uchurlargha asaslan'ghanda, 35 yashliq bu yash karxanichi, qeshqer qaghiliq nahiyiside tughulup ösken. 2004-Yili shinjang uniwérsitéti xewerlishish kespini püttürgen, uningdin kéyinki 5 yilda yeni 2009-yiligha qeder shangxey chet'el tili uniwérsitéti, shangxey tungji uniwérsitétlirida in'gliz tili, némis tillirini ögen'gendin sirt, karxana bashqurush kespide magistir aspirantliqini oqughan. Bu jeryanda shangxey sheherlik shinjang soda jem'iyitining da'imiy ishlar mes'ul hey'iti bolghan.

U 2009-yili 3-ayda shangxeyde qiran soda cheklik shirkitini qurup shirket bash diréktori bolghan, 2009-yili junggo “Munewwer musulman karxanichi” sheripige érishken. 2010-Yili 3-ayda junggu-ereb elliri soda medeniyet almashturush jem'iyitining mu'awin bash katipliqigha östürülgen.

Qiran shirkitige kelsek, bu shirket mulazimetni asas qilghan bolup, asasen import, éksport, musulmanche yémeklik we turmush buyumlirini sétish, Uyghur élining yerlik mehsulatlirini xitay we chet'ellerge éksport qilish qatarliq sodilardin bashqa yene, musulmanlar mulazimet merkizi, körgezme uyushturush mulazimiti, chet'elge oqushqa chiqirish mulazimiti, wakaliten wiza béjirish mulazimiti qatarliq soda we mulazimet türlirini yolgha qoyup téz rawaj tépiwatqan yash shirket.

Nöwette, jinayetchige aylan'ghan bu shexs hetta shinjang téléwiziyisining iqtisad programmisining izden'güchiler sehipiside 2010-yili 4-may küni awan'gart yash karxanichi süpitide mexsus tonushturulghan, u programma axirida özining bundin kéyinki pilanliri heqqidimu toxtalghan.

Shinjang qanunchiliq gézitining bu yil 16-öktebir sanida muhemmed élining qolgha élinish jeryani mundaq teswirlen'gen, bir er 7-awghust yeken nahiyilik jama'et xewpsizlik idarisige kélip muhemmed élining uningdin 75 ming yüen pul élip yalghan pasport béjirip bergenlikini melum qilghan. Saqchilarning déloni éniqlash jeryanida muhemmed élining 55 kishidin pasport béjirip bérish üchün jem'iy 805 ming yüen alghanliqi melum bolghan.

Éniqlinishiche, muhemmed éli bultur qazaqistanda tijaret qilghan jaw jishing isimlik bir xitay bilen tonushqan, jaw jishing pasport hel qilalaydighanliqini éytqandin kéyin, muhemmed éli uning bilen hemkarlishishqa bashlighan. Bu yil maydin tutulghiche u jaw jishinggha 34 ademning pasportini béjirgüzüsh üchün 340 ming yüen, yene parche xirajet üchün 12 ming yüen bergen. Emma jaw uninggha saxta pasport yasap ewetken, bu saxta pasportning birini alghan dawut, yeken nahiyilik jama'et xewpsizlik idarisi chégradin kirip chiqishni bashqurush etritige barghanda, saqchilar uning pasportining saxtiliqini éytqan, dawut shu künila déloni melum qilghan.

Muhemmed élining hazirqi ehwali, jinayi jazagha tartilghan-tartilmighanliqi téxi éniq emes. Bu heqte melumat élish üchün biz yeken nahiyilik jama'et xewpsizlik idarisi qatarliq xitay saqchi da'iriliri bilen alaqileshken bolsaqmu, saqchilar birdek bu heqte bizni uchur bilen teminleshni ret qilip kelmekte.

Shinjang qanunchiliq gézitining xewiride, muhemmed élining saxta pasportni bilip turup jaw bilen hemkarlashqanliqini, yene uning nurghun kishilerning pulini aldap éliwalghanliqi, yéqindin buyan uning sodisining rawaj tapmay shirkitining zawalliqqa qarap yüzlen'genliki, qiyin ehwalda qalghan muhemmed élining exlaq qarishining töwenlep qanunni közge ilmighanliqtin jinayet patqiqigha patqanliqi teswirlen'gen.

Emma, uni bilidighan Uyghurlar nechche milyon dollarliq xelq'araliq chong soda bilen shughulliniwatqan bilimlik, exlaqliq yash karxanichi bolghan muhemmed élining undaq exmeqliq qilishigha, azghina menpe'et üchün bilip turup jinayet yoligha méngishigha ishenmeydighanliqini, buning yene bir qabiliyetlik karxanichini, Uyghur igilikini weyran qilish üchün qurulghan qiltaq dep guman qiliwatqanliqini bildürüshmekte, shundaqla béziler yene, eger muhemmed élining saxta pasport ishlep aldamchiliq qilghanliqi rast bolghan teqdirde“Néme üchün shunche köp kishi 200 yüen'ge alghili bolidighan pasport üchün saqchigha iltimas qilmay, muhemmed élige oxshash yoli barlargha bunche küp pul xejleshke mejbur bolidu ? xelqning qanunluq pasport béjirelmey arqa ishiktin méngishi we mushundaq saxtiliqlargha yochuq échilishi kimning xataliqi dep so'al qoymaqta.