Қазақистанда йәнә бир аммивий адәм өлтүрүш вәқәси йүз бәрди

Қазақистан аммивий ахбарат васитилири йеқинда алмата вилайитиниң ақсай өңкүридә йүз бәргән қирғинчилиқ вәқәси һәққидә хәвәрләрни тарқитишни давам қилмақта.
Ихтияри мухбиримиз ойған
2012-08-17
Share


Мәлумки, ахирқи хәвәрләргә қариғанда, мәзкур җайда 11 адәмниң җәсити тепилған болуп, һазир тәргәв орунлири тәрипидин бу вәқәниң қандақ йүз бәргәнлики, униңға кимләрниң арилашқанлиқи һәм өлгәнләрниң кимликини ениқлаш буйичә җиддий ишлар елип берилмақта.

“мәркизи асия” тор бетидә мухбир александир трухачйеф мундақ дәп язиду: “алмата вилайитидики қанлиқ вәқәләр қазақистан пайтәхтиниму әндишигә салмақта. Дәл мушу йәрдә бүгүн чоң пәвқуладдә вәқәгә мунасивәтлик рәсмий чүшәндүрүшләр елан қилинди. Ички ишлар министирлиқиниң мухбирлар билән өткүзгән пәвқуладдә сөһбәт йиғинида сақчилар алтә адәмниң кимликиниң ениқланғанлиқини хәвәр қилди. Йәнә бәш адәмниң тени анализға әвәтилгән. 11 Адәмниң өлтүрүлүш мунасивити билән җинайи дило турғузулған. Тәхминләр вә гумандарлар һәққидә һазирчә һечнәрсә ениқ әмәс. Лекин, ички ишлар министирлиқиниң министири қасимоф бүгүн журналистларға тәргәвчиләрниң бәзи тәхминлирини билдүрди.”

Мақалә аптори 11 адәмниң вәһшиләрчә өлтүрүлгәнлик вәқәсини тәкшүрүшкә әң тәҗрибилик тәргәвчиләрниң, анализчиларниң җәлип қилинғанлиқини тәкитлигән. Униң ейтишичә, дәсләптә “тау самали” аһалә понкитидин 30 километр арилиқта икки адәмниң җәситиниң тепилғанлиқи һәққидә сақчиларға хәвәр қилинған. Лекин, тәргәв гурупписи бу йәргә келип икки әмәс, бәлки алтә адәмниң җәситини тапқан болуп, уларниң барлиқи пичақланған икән. Бу җәсәтләрниң орманчи вә униң аялиға, шундақла орманчиниң қол астида ишләватқан икки ишчиға вә орманчиниң йеқин тонушлириға тәәллуқ икәнлики ениқланған. Бу йәрдин 25 километр арилиқта йәнә бир орманчиниң өйи көйдүрүлгән болуп, у йәрдә йәнә бәш адәмниң көйгән тени тепилған. Ички ишлар министирлиқи рәһбириниң пәризичә, биринчидин, бу вәқә ички мунасивәтләрдин келип чиққан, иккинчидин болса, буни ташқиридин бири әмәлгә ашурған.

К т к телевизийисидә елан қилинған мәлуматларға қариғанда, вәқә йүз бәргән җайда һечнәрсә йоқалмиған. Бу қанлиқ вәқәни әмәлгә ашурғанларниң түп мәқсити орманчи панайот захаропуло болған дегән тәхмин илгири сүрүлмәктә икән, чүнки у интайин чоң вә мунбәт йәрни игиливелип, шәхсий мүлүккә айландурувалған.

Йәрлик органлар ақсайда йүз бәргән вәқә вә мушу йилниң май ейида алмата вилайитиниң арқан кәргән чегра понкитида болған вәқә оттурисида бағлинишниң йоқ икәнликини илгири сүргән. Әмди “тодей кз” агентлиқи хәвәр тарқитип, арқан кәргән чегра понкитида 15 адәмни өлтүргәнликидә әйиблиниватқан виладислаф челахниң бовиси виладимир челах бу икки қанлиқ вәқәниң бир - биригә мунасивәтилик икәнликини һәм бу җинайәтни әмәлгә ашурғанларниң техичила әркинликтә йүргәнликини оттуриға қойған.

Ақсай районида болған вәқә чәтәл аммивий ахбарат васитилириниң диққитини қозғиған болуп, бу һәқтә “нур кз” тор бетидә “дуня мәтбуати: алмата йенидики адәм өлтүрүшләр қазақистанниң абройини төкти” намлиқ мақалә елан қилинған иди. Мақалидә русийиниң “орал һәптилики”, әнгилийиниң б б с агентлиқи, америкиниң “ню йорк таймс” нәшриниң москва бюроси, шундақла “ассошейтед пресс” йеңилиқлар агентлиқи, германийиниң “дойче веле” йеңилиқлар миллий хизмитиниң алмата вилайитиниң арқан кәргән чегра понкити вә ақсайда йүз бәргән қирғинчилиқ вәқәсигә диққәт қилғанлиқи илгири сүрүлгән. Б б с агентлиқи қазақистандики турақлиқни алаһидә тәкитләп келип мундақ дәп язған: “әмма мухбирлар шуни көрсәттики, йеқин арида бир нәччә һуҗумлар билән әмәлгә ашурулған адәм өлтүрүшләр вә уларда исламчиларниң әйиблиниши, униңдин кейин уларни тар - мар қилиш үчүн сақчиларниң чоң оператсийилиригә бағлиқ маҗиралар, қазақистанниң пухта орнитилған турақлиқ образини тәвритип қойди.”

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт