Qazaqistanda yene bir ammiwiy adem öltürüsh weqesi yüz berdi

Qazaqistan ammiwiy axbarat wasitiliri yéqinda almata wilayitining aqsay öngküride yüz bergen qirghinchiliq weqesi heqqide xewerlerni tarqitishni dawam qilmaqta.
Ixtiyari muxbirimiz oyghan
2012-08-17
Élxet
Pikir
Share
Print


Melumki, axirqi xewerlerge qarighanda, mezkur jayda 11 ademning jesiti tépilghan bolup, hazir tergew orunliri teripidin bu weqening qandaq yüz bergenliki, uninggha kimlerning arilashqanliqi hem ölgenlerning kimlikini éniqlash buyiche jiddiy ishlar élip bérilmaqta.

"Merkizi asiya" tor bétide muxbir aléksandir truxachyéf mundaq dep yazidu: "Almata wilayitidiki qanliq weqeler qazaqistan paytextinimu endishige salmaqta. Del mushu yerde bügün chong pewqul'adde weqege munasiwetlik resmiy chüshendürüshler élan qilindi. Ichki ishlar ministirliqining muxbirlar bilen ötküzgen pewqul'adde söhbet yighinida saqchilar alte ademning kimlikining éniqlan'ghanliqini xewer qildi. Yene besh ademning téni analizgha ewetilgen. 11 Ademning öltürülüsh munasiwiti bilen jinayi dilo turghuzulghan. Texminler we gumandarlar heqqide hazirche héchnerse éniq emes. Lékin, ichki ishlar ministirliqining ministiri qasimof bügün zhurnalistlargha tergewchilerning bezi texminlirini bildürdi."

Maqale aptori 11 ademning wehshilerche öltürülgenlik weqesini tekshürüshke eng tejribilik tergewchilerning, analizchilarning jelip qilin'ghanliqini tekitligen. Uning éytishiche, deslepte "Ta'u samali" ahale ponkitidin 30 kilométr ariliqta ikki ademning jesitining tépilghanliqi heqqide saqchilargha xewer qilin'ghan. Lékin, tergew guruppisi bu yerge kélip ikki emes, belki alte ademning jesitini tapqan bolup, ularning barliqi pichaqlan'ghan iken. Bu jesetlerning ormanchi we uning ayaligha, shundaqla ormanchining qol astida ishlewatqan ikki ishchigha we ormanchining yéqin tonushlirigha te'elluq ikenliki éniqlan'ghan. Bu yerdin 25 kilométr ariliqta yene bir ormanchining öyi köydürülgen bolup, u yerde yene besh ademning köygen téni tépilghan. Ichki ishlar ministirliqi rehbirining periziche, birinchidin, bu weqe ichki munasiwetlerdin kélip chiqqan, ikkinchidin bolsa, buni tashqiridin biri emelge ashurghan.

K t k téléwiziyiside élan qilin'ghan melumatlargha qarighanda, weqe yüz bergen jayda héchnerse yoqalmighan. Bu qanliq weqeni emelge ashurghanlarning tüp meqsiti ormanchi panayot zaxaropulo bolghan dégen texmin ilgiri sürülmekte iken, chünki u intayin chong we munbet yerni igiliwélip, shexsiy mülükke aylanduruwalghan.

Yerlik organlar aqsayda yüz bergen weqe we mushu yilning may éyida almata wilayitining arqan kergen chégra ponkitida bolghan weqe otturisida baghlinishning yoq ikenlikini ilgiri sürgen. Emdi "Todéy kz" agéntliqi xewer tarqitip, arqan kergen chégra ponkitida 15 ademni öltürgenlikide eyibliniwatqan wiladislaf chélaxning bowisi wiladimir chélax bu ikki qanliq weqening bir - birige munasiwetilik ikenlikini hem bu jinayetni emelge ashurghanlarning téxichila erkinlikte yürgenlikini otturigha qoyghan.

Aqsay rayonida bolghan weqe chet'el ammiwiy axbarat wasitilirining diqqitini qozghighan bolup, bu heqte "Nur kz" tor bétide "Dunya metbu'ati: almata yénidiki adem öltürüshler qazaqistanning abroyini tökti" namliq maqale élan qilin'ghan idi. Maqalide rusiyining "Oral heptiliki", en'giliyining b b s agéntliqi, amérikining "Nyu york tayms" neshrining moskwa byurosi, shundaqla "Assoshéytéd préss" yéngiliqlar agéntliqi, gérmaniyining "Doyché wélé" yéngiliqlar milliy xizmitining almata wilayitining arqan kergen chégra ponkiti we aqsayda yüz bergen qirghinchiliq weqesige diqqet qilghanliqi ilgiri sürülgen. B b s agéntliqi qazaqistandiki turaqliqni alahide tekitlep kélip mundaq dep yazghan: "Emma muxbirlar shuni körsettiki, yéqin arida bir nechche hujumlar bilen emelge ashurulghan adem öltürüshler we ularda islamchilarning eyiblinishi, uningdin kéyin ularni tar - mar qilish üchün saqchilarning chong opératsiyilirige baghliq majiralar, qazaqistanning puxta ornitilghan turaqliq obrazini tewritip qoydi."

Toluq bet