London olimpik oyunida altun médalgha érishken qazaqistanliqlar heqqide qarimu-qarshi pikirler peyda bolmaqta

Bu qétimqi londonda ötüwatqan olimpik oyunliridimu qazaqistanliq tenheriketchiler deslepki altun médallirigha muyesser boldi.

Melumki, qazaqistanliq tenheriketchiler 25 tenheriket türi boyiche 115 musabiqini yéngiwalghan bolup, memliketning tenheriket agéntliqi shundaqla bezi analizchilarning texminliri boyiche, qazaqistan londonda asasen boks, chélishish, dzyudo we éghir atlétika türliri boyiche omumen 13 médal, shuning ichide üch altun médal élishni pilanlighan idi. Ötkenki béyjing olimpik oyunlirida bolsa qazaqistan ikki altun médalgha érishken. Bolupmu qazaqistanliq boks mahirlirining london olimpik oyunlirida yaxshi körsetküchlerni namayish qilalaydighanliqigha ümidler bildürülmekte.

Melumatlargha qarighanda, bügün'ge qeder qazaqistanliq tenheriketchilerdin aléksandir winokurof wélosipéd musabiqisi boyiche, zulfiye chin shenlo we mayya manéza éghir atlétika boyiche altun médallarni alghan bolup, bu weqe köpligen qazaqistanliqlarda yaxshi tesiratlar peyda qildi. Hazirche altun médal alghanlar ichidin xitay birinchi orunda, a q sh bolsa ikkinchi orunda kelmekte iken. Qazaqistan sekkizinchi orunni igiligen.

Qazaqistan olimpik komandisining mundaq netijilerge yétishige qarimay, dunya ammiwi axbarat wasitiliride qazaqistanliq tenheriketchiler heqqide bashqiche inkaslar peyda bolmaqta. “Zakon kz” tor géziti “Xitaylar qazaqistanliq shtankichi chin shenloni ashkarilidi. Bu bizning jaw chenlingghu namliq maqalini élan qilghan bolup, uningda mezkur tenheriketchining kélip chiqishi heqqide xitay ammiwi axbarat wasitiliride bashqa melumatlarning élan qilin'ghanliqi éytilghan. Yeni z. Chin shenloning xitay puqrasi ikenliki hem uning qazaqistan teripidin yallan'ghanliqi otturigha qoyulghan.

Emdi “Azadliq” radi'osi bolsa “Qazaqistan médalliri peqet xushalliq sézimlirinila peyda qilmaywatidu” dégen maqalide yuqirida atalghan her üch tenheriketchige munasiwetlik gumanliq melumatlarni bergen, yeni a. Winokurof ilgiri meniy qilin'ghan maddilarni istémal qilghanliqida eyiblinip, musabiqilerge qatnishishtin chetleshtürülgen bolsa, emdi z. Chin shenlo we m. Manézaning xitay teripidin qayturulushining mumkinliki heqqide éytilghan. Z. Chin shenlo heqqide mundaq déyilgen: “Ikkinchi altun médalni qazaqistan'gha 19 yashliq zulfiye chin shenlo élip keldi. Tenheriketchining kélip-chiqishigha baghliq ammiwi axbarat wasitiliride köpligen qarimu-qarshi xewerler bar. Olimpik oyunlirining resmiy tor bétide zulfiyening almatada tughulghanliqi éytilghan. Qazaqistanda köpchilik zulfiyening milliti tunggan ikenlikige, qazaqistan zéminida tughulup we xitayda chong bolghanliqigha ishinidu.

Wikipédi'ide zulfiye qazaqistan yaki qirghizistanda tughulghan, andin kéyin xitaygha köchüp barghan déyilgen. Yéqinda xitay dölet ammiwi axbarat wasitiliri zulfiyening xitayda, xunen ölkisining yungju dégen yéride tughulup öskenlikini xewer qilghan. Amérikining s n n agéntliqi xitayning xunendiki tenterbiye ishliri boyiche xitay emeldarining 2007-yilning martida birleshken chiniqturush mezgilide, qazaqistan komandisining zulfiyedin heweslen'genliki toghriliq esligenlikini yazghan. Maqalide shundaqla zulfiyening besh yilgha qazaqistan teripidin yallan'ghanliqi, xelq'ara olimpik komitétining qa'idiliri boyiche puqraliqini özgertken tenheriketchilerning üch yil ichide özining yéngi memlikitige wekillik qilalmaydighanliqi ilgiri sürülgen.

Qazaqistan olimpik mehkimisi wekili alékséy kryuchkof özining “Wésti kz” tor gézitigha bergen söhbitide, xitay ammiwi axbarat wasitiliride z. Chin shenlo heqqide peyda bolghan xewerlerni yoqqa chiqirip, mundaq dégen: “Biz ularni mezkur ghalibiyetke pütün bir olimpik dewr mabeynida élip mangduq hem buningghiche ular bizning milliy komandimiz ezaliri boldi.”