Хәлқара қәләмкәшләр җәмийити тутқун мәһбубә абләшниң тәқдиригә көңүл бөлмәктә

Мәркизи лондонға җайлашқан хәлқара қәләмкәшләр җәмийити, тутқун мәһбубә абләш һәққидә өткән һәптә б д т ниң мунасивәтлик органлириға доклат йоллиди.
Мухбиримиз шөһрәт һошур
2008-10-14
Share
Mehbube-Ablesh-305.jpg Мәһбубә абләшниң вақти ениқ болмиған бир парчә сүрити. Бу сүрәтни радио аңлиғучилиримиздин бири радиомизға әвәткән.
Photo: RFA

Доклатта, хитайниң мәһбубә абләшни қолға елиш билән хәлқара кишилик вә сияси һоқуқ әһдинамисиниң 19 ‏ - маддисиға хилаплиқ қилғанлиқи көрситилди вә хитайниң мәзкур әһдинамигә қол қойғанлиқи әскәртилди.

Мәһбубә абләш интернеттә елан қилған тәнқидий мақалиси сәвәблик 8 ‏ - айниң бешида қолға елинған иди. Нөвәттә хәлқара җамаәт мәһбубә абләшниң тәқдиридин әндишә қилмақта, хитай тәрәп болса мәһбубә абләш һәққидә мәлумат беришни изчил рәт қилип кәлмәктә.

Хәлқара қәләмкәшләр җәмийити өткән айда җәнубий америкиниң колумбийә җумһурийитидә 74 ‏ - қетимлиқ омумйиғини ачқан, йиғинда уйғур қәләмкәшләр мәркизи тутқун мәһбубә абләш һәққидә доклат сунған, қурултай мәһбубә абләш һәққидә мәхсус қарар чиқарған иди. Бу қарарға асасән нөвәттә хәлқара қәләмкәшләр җәмийитиниң алақидар тармақлири паалийитини башлиди. Хитайдики бошүн торида хәвәр қилинишичә, хәлқара қәләмкәшләр җәмийитиниң түрмидики қәләмкәшләр комитети өткән һәптә йәнә баянат елан қилған.

Баянатта, хитайниң мәһбубә абләшни дәрһал қоюветиши вә яки мәһбубә абләшниң адвокат тутуп өзини ақлишиға адил пурсәт бериши тәләп қилинған. Уйғур қәләмкәшләр мәркизиниң баш катиби қәйсәр абдурусулниң билдүрүшичә, хәлқара қәләмкәшләр мәркизи мәһбубә абләшкә адвокат тутуш үчүн 1000 явру пул аҗратқан, уйғур қәләмкәшләр мәркизи нөвәттә мәһбубә абләшкә адвокат тепишниң йолини издимәктә.

Хәлқара қәләмкәшләр мәркизиниң б д т ға йоллиған доклатида тилға елинған хәлқаралиқ әһдинамида мунулар билдүрүлгән: " бу әһдинамигә қол қойған дөләтләр пуқраларниң дуняниң һәр қандақ йеридин һечқандақ чәклимигә учримастин әркин учур игиләш, әркин пикир баян қилиш, охшимиған пикирләрни мәйли йезиқ, мәйли ағзаки болсун ипадиләш һоқуқиға һөрмәт қилиду вә капаләтлик қилиду."

Хитай мана бу келишимгә имза қойған дөләтләрдин биридур. Хәлқара қәләмкәшләр җәмийити йәнә, өз әзалириниң вә қоллиғучилириниң, хитай президенти ху җинтав вә уйғур райониниң рәиси нур бәкригә, мәһбубә абләшни қоюветишни тәләп қилип очуқ мәктуп йезишқа, мәктупни өзлири туруватқан дөләтләрдики хитай әлчиханисиға тапшурушқа чақирған.

Қәйсәр абдурусулниң билдүрүшичә, хәлқара қәләм мәркизиниң б д т ға йоллиған доклатида, мәһбубә абләштин башқа йәнә тохти музат, нурмуһәммәт ясин, абдуғени мәмтимин қатарлиқ уйғур қәләмкәшләрниң һәқсизлиққа учриғанлиқи мәсилиси вә уйғур райониниң нөвәттики омумий сиясий вәзийити тонуштурулған. Мәһбубә абләш мәсилиси нөвәттә хәлқара қәләмкәшләр җәмийити җүмлидин уйғур қәләмкәшләр мәркизиниң хизмәт күн тәртипидә алдинқи орунни игилигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт