Хәлқара қәләмкәшләр мәркизиниң 9-нөвәтлик түрмидики қәләмкәшләрниң һәқ-һоқуқини қоғдаш йиғини ахирлашти

Белгийә пайтәхти брюссәлда ечилған хәлқара қәләмкәшләр мәркизиниң 9-нөвәтлик түрмидики қәләмкәшләрниң һәқ-һоқуқини қоғдаш йиғини. 2011-Йили 24-27-март.

Йиғинға қатнашқан хәлқара қәләмкәшләр уйғур мәркизиниң рәиси қәйсәр өзһун әпәнди 3-айниң 26-күни өткүзүлгән, хитайдики қәләмкәшләр вә уйғур, тибәт қәләмкәшлири мәсилиси муһакимә йиғинида сөзгә чиқип, “ ява кәптәр” намлиқ әсири түпәйли 10 йиллиқ қамақ җазасиға учриған нурмуһәммәт ясин қатарлиқ уйғур қәләмкәшлириниң паҗиәлик тәқдири тоғрисида доклат бәрди.

RFA/Ekrem

Түрмидики уйғур қәләмкәшлири мәсилиси йиғин әһлиниң күчлүк диққитини җәлп қилди. Уйғур қәләмкәшләр тәшкилатиниң рәиси қәйсәр өзһун әпәнди бу тәшкилатниң уйғур қәләмкәшлири мәсилисини йиллардин буян оттуриға қоюп келиватқанлиқини, хәлқара қәләмкәшләр мәркизигә тәвә 145 тәшкилат әзалириниң уйғурлар һәққидә чоңқур чүшәнчигә игә икәнликини тилға алди.

Қәйсәр өзһун әпәнди, хәлқара қәләмкәшләр мәркизиниң һәр қетимлиқ йиғинида нурмуһәммәт ясин мәсилиси арқилиқ бир пүтүн уйғур мәсилисини дуня язғучилириға тонутуп келиватқанлиқини, бу қетимқи хәлқаралиқ йиғиндиму йүзлигән даңлиқ язғучиларға уйғурларниң азаблиқ һаят кәчмишлирини аңлитиш пурситигә еришкәнликини, “ява кәптәр” намлиқ әсәрниң җәмий 40 хил тилға тәрҗимә қилинғанлиқини ейтти.

Хәлқара қәләмкәшләр мәркизиниң б д т вә явропа парламентидиму мәхсус вәкиллири хизмәт қиливатқан болуп, 3-айниң 26-күни улар хәлқара қәләмкәшләргә вакалитән б д т вә явропа парламентида елип барған паалийәтлири тоғрилиқ доклат берип өткән иди. Қәйсәр өзһун әпәнди уйғурлар мәсилисини уларниң тиришчанлиқи арқилиқ б д т һәм явропа парламентиға аңлитиш имканлириниң барлиқини, 2010-йили нурмуһәммәт ясин мәсилисини аңлитип өткәнликини тилға алди.