Ikki neper Uyghur yash, xitay eskerlirige hujum qilip, 16 eskerni öltürgen

Xitay chégra mudapi'e qisimining qeshqerde turushluq etriti bugün etigen ushtumtut hujumgha uchrighan. Hujumda 16 neper esker ölgen, 16si yarilan'ghan. Hujum qilghuchilar 28 we 30 yashtiki ikki neper Uyghur yash bolup, ular qolgha élin'ghan.
Muxbirimiz shöhret hoshur xewiri
2008-08-04
Élxet
Pikir
Share
Print
2008‏-Yili 4 - awghust seherdiki 2 uyghurning xitay qoralliq saqchilirigha qilghan hujumidin kéyin, xitay saqchiliri pütün qeshqer kochilirida razwédkini kücheytken bolup, sürette, charlighuchi xitay saqchiliri chetellikler bilen sözleshmekte.
2008‏-Yili 4 - awghust seherdiki 2 uyghurning xitay qoralliq saqchilirigha qilghan hujumidin kéyin, xitay saqchiliri pütün qeshqer kochilirida razwédkini kücheytken bolup, sürette, charlighuchi xitay saqchiliri chetellikler bilen sözleshmekte.
AFP Photo
 Weqeni eng deslep shinxu'a agéntliqi xewer qildi. Xewerde weqe heqqide nahayiti qisqa melumat bérilgen. Bu melumatqa asaslan'ghanda, etigen sa'et 7 din 55 minut ötkende, ikki neper Uyghur bir yük aptomobili bilen kélip, bir méhxana aldida meshq élip bériwatqan xitay eskerlirige hujum qilghan. Ular aldi bilen yerlik usulda yasalghan qol bombisi atqan, arqidin pichaq bilen hujum qilghan.

Xewerde yene, yük aptomobiligha partlatquch dora qachilan'ghanliqi we uning yol yaqisidiki istolbigha üsüp partlitilghanliqi bayan qilin'ghan. Xewerde bildürülüshiche, hujumchilardin biri bir puti yarilan'ghan, yene biri bir qolidin ayrilghan halette tirik qolgha élin'ghan.

Biz weqe heqqide melumat élish üchün qeshqerdiki alaqidar orunlargha téléfon qilduq. Saqchi orunliri weqe heqqide melumat bérishni ret qildi. Qeshqer wilayetlik 2 ‏- doxturxanigha téléfon qilip, yaridarlarning ehwalini sorighinimizda, yaridarlarning wilayetlik 1‏ - doxturghanida ikenlikini bayan qildi. 1 - Doxturxanigha téléfon qilghinimizda, yaridarlar sanini 17 dep bildürdi. Emma tepsiliy melumat bérishni ret qildi.

Biz téléfon mulazimet bash aparati xadimliridin bügün etigen weqe yüz bergen méhmanxanining téléfonini dep béring déginimizde, yichüen méhmanxanisining téléfonini berdi. Yichu'en méhmanxanisi qeshqer milliy shipaxanisigha yéqin jayda we semen yoli üstide bolup, weqening semen yolida yüz bergenliki éhtimalgha yéqin körünmekte.

Shinxu'a agéntliqi bu xewerni tarqatqandin kéyin, pütün dunya axbarati nezirini qeshqerge aghdurdi. Emma da'iriler chet'el muxbirlirigha weqening yüz bergenlikini étirap qilghan bolsimu, tepsilatini bayan qilmighan. Fransiye axbarat agéntliqi ürümchi ayrodromida qeshqerdin qaytqan bir gérmaniyilik sayahetchidin ehwal igiligen.

Gérman sayahetchi Siegfried Maurer özining etigen sa'et 8 de qattiq partlighan bomba awazi bilen oyghan'ghanliqini, weqening özi turghan méhmanxanining aldidiki yolda yüz bergenlikini, weqedin kéyin 4 sa'etkiche özlirining sirtqa chiqishigha yol qoyulmighanliqini bildürgen. U yene bir türküm saqchilarning yataqqa kirip, resim we sinalghu aparatlirini tekshürgenlikini bildürgen. Yene bu sayahetchi, saqchilarning weqe yüz bergen yolni yuyup qan daghlirini tazilighanliqini bildürgen.

Amérikiliq sayahetchi Timothy O'Rourke weqe yüz bergen meydan'gha, 5 sa'ettin kéyin bérip weziyetni közetken. U fransiye axbarat agéntliqigha: "etrapta bir qanche saqchi aylinip yürüptu, kocha chiliq - chiliq su, weqening izini yoshurushqa tirishiliwatqanliqi éniq. U yene weqe yüz bergen meydanda, yol yaqisidiki bir binada dez ketken dériziler, yiqilghan bir istolba we chéchilip yatqan tok simliri qatarliq weqening izlirini hélihem körgili bolidu," dep bayan qilghan.

 Bügünki xelq'ara xewerlerde, aldinqi ayda qeshqerde 5 kishige ölüm jazasi bérilgenliki, ürümchide diniy söhbet üstidiki qoralsiz Uyghurlarning oqqa tutulghanliqi qatarliq Uyghurlar hayatidiki zor we échinishliq weqeler eslep ötüldi. Xewerlerde yene, Uyghur rayonining mu'awin re'isi küresh mexsutning bu weqedin üch kün awwal sherqi türkistanchilar tehdit salalmaydu dégen sözliri qisturuldi. Xewerlerde bolupmu, bu weqening olimpiktin 4 kün awwal yüz bergenliki alahide tekitlendi.

Toluq bet