Канада уйғур җәмийитиниң рәиси қеюм мәсимуф бир қатар зиярәт вә учришишлар елип барди

Канада уйғур җәмийитиниң рәиси қеюм мәсимуф канаданиң бейҗиңда турушлуқ йеңи вә сабиқ баш әлчилири билән көрүшти. У йәнә канада алберта өлкисиниң әдминтон вә калгари шәһәрлиридики уйғурлар вә шу шәһәрләрниң өктичи партийә хадимлири билән сөһбәттә болди.
Ихтиярий мухбиримиз гүлшән абдуқадир
2012-11-22
Елхәт
Пикир
Share
Принт
Канада уйғур җәмийитиниң рәиси қеюм мәсимоф җейсон кенниға уйғур допписи вә рабийә қадир ханимниң һаяти паалийәтлири тонуштурулған «әҗдиһа билән елишқан аял» намлиқ китабни соға қилди. 2012-Йили 29-сентәбир, торонто.
Канада уйғур җәмийитиниң рәиси қеюм мәсимоф җейсон кенниға уйғур допписи вә рабийә қадир ханимниң һаяти паалийәтлири тонуштурулған «әҗдиһа билән елишқан аял» намлиқ китабни соға қилди. 2012-Йили 29-сентәбир, торонто.
RFA/Gulshen

Йеқинда, канаданиң бейҗиңда турушлуқ баш әлчиси алмашқан болуп, әслидики сабиқ әлчи вәзиписидин айрилип униң орниға йеңи әлчи тәйинләнди. Бу мунасивәт билән канададики хитайда демократийә намлиқ тәшкилатниң күнлүки астидики уйғур, тибәт, фалунгоң вә хитай демократик тәшкилатлириниң рәһбәрлири йеңи баш әлчиниң қобул қилишиға дахил болди. Баш әлчи қеюм мәсимуф билән 2 саәт әтрапида уйғурларниң һазирқи әһвали һәққидә сөһбәтләшкән. Бу ғәйрий рәсмий учришиш болғанлиқи үчүн қеюм мәсимуф сөһбәтниң әмәлий мәзмунини ашкара елан қилишни халимайдиғанлиқини билдүрди.

Йеқинда, канада асия ишлири комиссийониниң йиллиқ йиғиниға қатнашқан қеюм мәсимуф йиғин җәрянида канаданиң бейҗиңда турған сабиқ баш әлчиси билән көрүшүп, уйғурларниң канадада қандақ сиясий паалийәтләрни елип бериши керәклики һәққидә қиммәтлик тәклип пикирләрни алған.

Канаданиң алберта өлкиси канаданиң иқтисади җәһәттә әң гүллиниватқан нефит өлкиси болуп, бу өлкиниң киши беши иқтисади кирими пүтүн канада бойичә алдинқи орунда туриду. Алберта өлкисиниң әдминтон вә калгари шәһәрлиридиму бир қисим уйғурлар яшайдиған болуп, канаданиң бу икки нефит шәһири канададики уйғурлар нәзиридә, қарамай вә майтағ шәһәрлиригә тәқлид қилиниду. 1933-Вә 1944-йили қәшқәрдә вә ғулҗида қурулған шәрқи түркистан җумһурийәтлириниң хатирә күнигә үлгүрүп әдминтон вә калгари шәһәрлиригә қарита 2 күнлүк зиярәт елип барған қеюм мәсимуф калгари шәһиридики уйғурлар билән бирликтә шәрқи түркистан җумһурийитиниң қурулған күнини хатирилиди. Бу икки шәһәрдики уйғур җамаитини йоқлаш вә улар билән қоюқ мунасивәт орнитиш, қеюм мәсимуфниң сайлам риқабити җәрянида көпчиликкә бәргән вәдилириниң бири иди.

Калгари шәһиригә қаратқан зиярәт җәрянида қеюм мәсимуф, калгари шәһиридики уйғур җамаити билән бирликтә, хәлқара кәчүрүм тәшкилатиниң калгари шөбисидики хадимлар билән көрүшүп, уларға уйғур хәлқи нөвәттә дуч келиватқан мәсилиләрни аңлатқан.

Канаданиң алберта өлкиси йәнә хитай әң көп мәбләғ селиватқан өлкиләрниң бири болуп, йеқинда хитай 15 милярд доллардин артуқ сәрмайә билән сетивелиш тәклипини оттуриға қойған нексон нефит ширкити мушу өлкигә җайлашқан. Хитайниң канаданиң йәр асти байлиқлирини сетивелишиға қарита бу өлкә хәлқи вә өктичи партийидики сиясәтчиләр қаттиқ наразилиқ билдүрүп келиватқан болуп, улар харпер консерватип һөкүмитини канаданиң йәр асти байлиқлирини хитайдәк бир диктатор дөләткә сетиш билән изчил әйибләп кәлмәктә. Бу пурсәтни чиң тутқан қеюм мәсимуф әдментон вә калгари шәһиригә қаратқан 2 күнлүк зиярәт җәрянида калгаридики өктичи партийә хадимлири билән көрүшүп хитайниң көпләп мәбләғ селишиниң келәчәктә канадаға елип келидиған хәтәрлири һәққидә өз көз қарашлирини билдүргән.

Юқиридики улиништин бу программиниң тәпсилатини аңлиғайсиләр.

Пикирләр (0)
Share
Толуқ бәт