Qirghizistanda yéngi birleshme hökümet teshkillendi

Qirghiz prézidénti almasbeg atambayéw prézidént bolup saylan'ghandin kiyin köpchilikke salam bermekte

Qirghizistan sotsiyal démokratlar partiyisi prizidént atambayifning 10 - dikabirdiki tapshuruqigha asasen bir heptidin buyan parlaménttiki her qaysi terepler bilen meslihetlishish arqiliq bügün, risbublika, ata makan we ar - namus partiyiliridin teshkillen'gen birleshme hökümetning barliqqa kelgenlikini ilan qildi. Risbublika partiyisining bashliqi ümürbék babanuf birleshme hökümetning bash ministirliqi wezipisige teyinlendi.

43 Yashliq ömürbék babanuf qirghizistanning siyasi sehnisidiki islahat terepdarliqi bilen tonulghan rehberlerning biri. U almasbék atambayif bashchiliqidiki hökümette birinchi mu'awin bash ministirliq wezipisini ötigen bolup, xelq arisida atambayifning eng yéqin yardemchisi dégen nami bar. U yitekligen risbublika partiyisi 7 - april inqilabidin kéyin atambayif bashchiliqidiki qirghizistan sotsyal démokratlar partiyisi bilen yéqindin hemkarliship, memliket ichide iqtisadni güllendürüsh, xelqning turmush sewiyisini yuqiri kötürüsh, dölet organliridiki parixorluqqa qarshi turush, burunqi prizidént qurmanbék bakiyif dewride xitay qatarliq döletlerge mexpiy halda sétiwitilgen kömür kanlirini memliketke qayturiwélish qatarliq jehetlerde köpligen xizmetlerni ishligen. Tashqi siyasette u atambayifning rusiye bilen omumyüzlük istratégiyilik hemkarliq munasiwiti ornitish,rusiye bashchiliqidiki tamuzhna - baj ittipaqigha kirish arqiliq tashqi iqtisadi munasiwetlerde xitaygha biqinip qélishtin saqlinish teshebbusini qollighuchilarning biri.

Ömürbék babanuf bügün parlaméntta qilghan sözide, döletning iqtisadi yükini yenggillitish meqsitide hazirqi yigirmidin artuq ministirliqni 15 ke qisqartidighanliqini, ma'arip,sehiye, tamuzhna, ediliye qatarliq organlardiki parixorluq qilmishlirigha qanun asasida qattiq charilerni qollinidighanliqini, yiza igilikini yükseldürüsh meqsitide kiler yildin bashlap déhqanlargha 7%lik yenggillitilgen ösum bilen qerz bérilidighanliqini bildürdi.

Bügünki parlamént yighini yene eslidiki parlamént bashliqi exmetbék keldibékning ornigha asilbék jiyenbékni yéngidin parlamént bashliqliqigha saylidi. Exmetbék keldibék hoqoqidin paydilinip dölet maliyisige éghir ziyan keltürgenliki, qanun organliri teripidin tutush buyriqi chiqirilghan jinayetchi guruhning bashchiliri bilen yéqin munasiwette bolup kelgenliki qatarliqlarning pash bolushi sewebidin 14 - dikabirda xizmitidin istipa bérishke mejbur bolghan idi.