Gollandiyidiki " erk kino studiyisi" tunji Uyghurche filim ishlidi

Uyghurlar chet'elde kino ishleshke bashlidi. Gollandiyining amstérdam shehride yashawatqan yash heweskar réjissori abduraxman öztürk ependi ishligen `judaliq` namliq hékaye filim resmi bazargha sélin'ghan.
Muxbirimiz erkin tarim
2008-11-14
Share
Uyghur-filim-judaliq-305.jpg Gollandiyining amstérdam shehride yashawatqan yash heweskar rézhissor abduraxman öztürk ependi ishligen `judaliq` namliq hékaye filimning élan muqawisidin körünüsh.
RFA / Erkin Tarim

Bu kinoning hékayisini Uyghur diyaridiki waqtidimu kino ishlesh ishliri bilen shughullan'ghan, hazir gollandiyining amstérdam shehride yashawatqan abduraxman öztürk yazghan bolup, bu filimde hazir yawropada yashawatqan jesur isimliq bir Uyghur yashning Uyghur diyarida namrat bir a'ilide tughulghan bolsimu, yawropagha chiqip oqup meshhur bir ressam bolghiche bolghan ariliqtiki sergüzeshtiliri eks ettürülgen.

Filimdiki jesur isimlik yash Uyghur diyarining lopnor nahiyiside dunyagha kelgen bolup, kichikidin tartip resim sizishqa qiziqidiken. Uning baliliq chéghi namratliq ichide ötken bolup, kichik yashta uning anisi tügep kétip yétim qalghan. Jesur kichiklikidin tartip ilim -pen'ge intilidighan bala bolghachqa biraz chong bolghanda oqush üchün ürümchige kélidu.

Ürümchidiki hayatimu yétimchilik we namratliq ichide ötidu, oqush üchün pul tapalmay ürümchi kochilirida ayagh maylashqa mejbur qalghan yashni rehmetlik dadisining eng yéqin dosti bolghan niyaz tagha béqiwalidu. Jesur uning iqtisadi yardimi bilen oqush üchün yawropagha chiqidu, yawropada oqup xizmetke orunliship kespiy jehettin zor muweppeqiyetlerni qolgha keltürüshke bashlighan jesur, özining qan rakigha giriptar bolghanliq xewirini alidu.

Wapat bolush aldida turghan jesur öz wetinige bolghan séghinishi tüpeyli yawropani tashlap wetinige qaytish körünishi bilen kino axirlishidu. Démek bu kinoda hem ata-anisidin hem ana wetinidin ayrilghan kespide zor muweppeqiyetlerni qolgha keltürgen bir yashning hayati eks ettürülgen. Yeni kinodiki jesur öz wetinidin ata-anisidin ayrilipla qalmastin yawropagha barghandin kéyin bextke qarshi hayatidinmu ayrilidu.

Bu filimning körünüshlirining lopnor, ürümchi we gollandiyining paytexti amstérdamda tartilghanliqini éytqan yash heweskar abduraxman öztürk ependi gerche bu kino yuqiri téxnika we köp meblegh sélip ishlenmigen bolsimu, kéyinki yillarda chetelge chiqqan Uyghurlar teripidin ishlen'gen Uyghurlarning hayatini biterep halda eks ettürgen tunji kino ikenlikini éytti.

Abduraxman öztürk ependi ürümchidiki waqtidimu ézitqu kino ishlesh shirkitini qurup kino ishligen bolsimu xitaydiki qanunsizliq tüpeyli ziyan tartip shirketni yépiwétishke mejbur qalghanliqini éytti. Bu kino lintisini sétiwélishni xalighan kishiler töwendiki adrés bilen alaqilashsa bolidu. www.erkstudio.com . Kinoni ishligüchi abduraxman öztürk ependi téléfon ziyaritimizni qobul qilip `judaliq` isimlik kino heqqidiki so'allirimizgha jawab berdi.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet