Қошават йезилиқ партком секретари ли һәққидә мулаһизә

Йапонийилик бир мухбирниң қәшқәр зийаритидин кейин, Youtube та елан қилған, уйғур диханлириниң хитайниң баҗ - селиқиға қилған налилири әкис әттүрүлгән син - алғусидин тартилған сүрәт.

Уйғур зиялийлириниң қаришичә, парихорлуқ хитайдики рәһбәрлик қатлими үчүн һәйран қаларлиқ илләт әмәс. Әмма парихорлуқ билән биллә һәм муштумзорлуқ, қимарвазлиқ, истилий бузуқлуқ қатарлиқ бир йүрүш илләтләрниң һәммисиниң секретарда лида тепилиши; лидики бу илләтләрни йезидики пүтүн хәлқниң билиши кишини ойландуридиған әһвалдур.

Мана мушундақ бир киши қандақ болуп, йезиниң секретари болуп қалди? мушундақ бир киши қандақларчә 15 йил һоқуқ туталиди? бу соалларға нөвәттә шиветсийидә яшаватқан уйғур зиялийлиридин мирзаәхмәт муһәммәд әпәнди әтраплиқ җавап бериду.

Мирзаәхмәт әпәндиниң қаришичә, әмәлдарлардики чирикликниң йилтизи сияси түзүлмидә вә һакимийәтниң характерида. Сотсиялист түзүм секретар лиға парихорлуқ пурситини, мустәмликичи һакимийәт болса, муштумзорлуқ вә истилий бузуқлуқ пурситини бәргән.
 
Мирзаәхмәт әпәндиниң қаришичә, чирикликтә бу дәриҗигә йәткән бир рәһбәр пәқәт уйғур елидә тепилиду, болупму уйғур елиниң җәнубтики вилайәтлиридә көп учрайду. Чүнки җәнубтики иқтисадий шараитниң техиму начар болуши, бир қисим кишиләрни җан қайғусиға селип қойған; уларда һәқ-һоқуқини издәш әмәс, ойлаш җасаритиму қалдурмиған. Мана бу сәвәблик чирик әмәлдарлар шиддәтлик вә әҗәллик қаршилиқларға дуч кәлмигән, чирикликтә һәддидин ашқан.

Мирзаәхмәт әпәнди сөзиниң ахирида, бу йил олимпик мәзгилидә пәйзиватта йүз бәргән, яманяр вәқәси , қизилбойи вәқәсини әсләп өтти вә әнә әшу вәқәни пәйда қилған яшларниң мәқсәтлиридин бириниң "лиға охшаш әмәлдарларға һәддини билдүрүп қоюш" икәнликини әскәртти.