"Қурбан һейт кечилики" программиси уйғурларниң қаттиқ наразилиқини қозғиди

Сәнәт кечиликидә, шинҗаң нахша - усул өмикиниң сәнәтчиси дилнар абдулла " чин сөйгүдин яшнимақта җан, инақлиқтин күләр бу макан, һәммә йәрдә йеңи ярдәм чин микрибанлиқ, гүзәл нурлуқ келәчәкни қилмақта аян " дәп нахша орунлиған болуп, әмма чәтәлләрдики уйғурлар, бу сәнәт кечиликидә ейтилған сөзләрниң пүтүнләй сахта тәшвиқаттин ибарәт икәнликини оттуриға қоюп, нөвәттә уйғур диярида уйғурлар билән хитайлар оттурисида миллий иттипақлиқтин сөз ечишниң әсла мумкин әмәс икәнликини билдүрмәктә. Радиомиз игилигән мәлуматларға асасланғандиму, икки милләт арсида өчмәнликниң  бурунқидин нәччә һәссә еғирлишип кәткәнлики, болупму өткән йили 5 ‏- июл күни үрүмчидә йүз бәргән вәқәдин кейин һәтта уйғурлар зич топлушуп олтурақлашқан районларда хитайларни наһайити аз учратқили болидиғанлиқи, һәтта хитайларниң уйғур хошнилиридин қечип, хитайлар көп районларға көчөп кетиватқанлиқи ашкариланған иди.

Германийидә яшаватқан уйғур паалийәтчи вә язғучи көрәш атахан әпәнди, бу қетимқи " қурбан һейт сәнәт кечилики" программисини көргәндин кейинки тәсиратлирини баян қилди.

" Қурбан һейт сәнәт кечилики" дә, атақлиқ нахшичи абдулла абдуреһим вә шамил шакир қатарлиқ сәнәтчиләр хитай тилида нахша орунлиғандин сирт, 5 ‏- 6 яшлиқ омақ уйғур қизлириниң хитай тилида орунлиған епизотлири һәмдә йәнә чаңчил нәзмилири көрситилгән. язғучи күрәш атахан әпәнди, мусулман милләтләрниң қурбан һейти үчүн беғишланған мәзкүр сәнәт кечиликиниң, әмилийәттә болса худди хитайларниң " чаған" байрами үчүн һазирланған сәнәт программиси түсини алғанлиқини билдүрди.

 " Қурбан һейт сәнәт кечилики" дә, туңган, қаазақ, қирғиз, татар, таҗик, моңғул һәтта нопуси интайин аз рус қатарлиқ барлиқ милләтләрниң нахша - музика вә усуллири орун алған болуп, күрәш атихан әпәнди,"бу хитай һөкүмитиниң ташқи дуняға "һәрқайси милләтләр тәң барабәр һәқ - һоқуққа игә " дегән сахта сияситини тәшвиқ қилишидин ибарәт икәнликини, нөвәттә уйғурларниң әң кичик итник гуруппилар игә болған имтиязлардинму мәһрум қалдурулғанлиқини билдүрди.

Қурбан һейт сәнәт кечилики" дә, риясәтчи тохтимастин партийә сиясити вә хитай өлкилириниң ярдими астида зор тәррәққиятларниң барлиққа кәлгәнликини мәдһийәләйду, "сәнәтчиләр"шинҗаңға келиңлар, силәрни қизғин күтивалимиз, һәммимиз бирликтә шинҗаңни гүлләндүрәйли" мәзмунлуқ нахшиларни орунлайду, ахирида ишәккә менип, бейҗиңға берип мав зедоң билән көрүшкән қурбан тулум " ривайити" көрситилиду. Күрәш атихан әпәнди,хитай һөкүмитиниң бу хил сахта тәшвиқатлириға уйғурларниң һәргиз алданмайдиғанлиқини, әгәр уйғур хәлқиниң барлиқ һәқ - һоқуқлириға һөрмәт қилинмиса, уйғурларниң һаман бир күни йәнә қаршилиқ көрситидиғанлиқини билдүрди.