Dalay lama rabiye qadir xanimning mektupi, Uyghur doppisi we etlisini xushalliq bilen qobul qildi

Tibet sergerdan hökümitining rohaniy dahiyisi dalay lama 11-ayning 4-künidin bashlap yaponiyide mexsus ziyarette bolmaqta. U bu qétimqi ziyaritide asasliqi budda diniy telimati bilen ilim-penning munasiwiti yeni “Dalay lama bilen alimlarning di'alogi” dégen témidiki muhakime yighinlirigha qatnashqan. Bu qétimqi pa'aliyetke tokyo uniwérsitéti qatarliq uniwérsitétlardiki tebi'iy pen we ijtima'iy pen sahesidiki alim, mutexessisler özlirining asman jisimliri, insanlardiki étiqad mesilisi, kishilik munasiwet we hayatliqtiki ötmüsh, kélechek qatarliq témilarda özlirining tetqiqat maqalilirini oqup ötken. Dalay lama bu mesililer üstide özining diniy köz-qarashlirini bayan qilip ötken.

Yaponiyide ziyarette boluwatqan tibetning rohaniy dahiyisi dalay lamaning yaponiyidiki ziyariti jeryanida “Xelq'ara Uyghur kishilik hoquq tetqiqat jem'iyiti”ning ezaliri bilen uchriship hem söhbette bolidighanliqidin xewer tapqan Uyghur milliy herikitining rehbiri rabiye qadir xanim washin'gtondiki ishxanisidin özining mektupini, salimini, Uyghur doppisini we etlisini derhal yollap, öz namidin bu qétimqi uchrishishqa qatnishidighan ezalargha, dalay lama ependimge yetküzüp bérishni hawale qilghan.

11-Ayning 6-küni chüshtin kéyin sa'et bir yérimda, tokyodiki besh yultuzluq okura méhmanxanisida tibetning rohaniy dahiyisi dalay lama, tibet sergerdan hökümitining wekilliri“Xelq'ara Uyghur kishilik hoquq tetqiqat jem'iyiti” ning ezaliri bilen yeni kagoshima xelq'ara uniwérsitétining proféssori gérmaniyilik proféssor doktor balmun ependi qatarliq bir guruppa kishiler uchriship, söhbette bolghan. U bu qétimqi uchrishishta Uyghur milliy herikitining rehbiri rabiye qadir xanimning mektupini, salimini, Uyghur doppisini we etlisini dalay lamagha tapshurup bergen. Dalay lama ependi xushalliq bilen qobul qilip, özining salimini bu wekiller arqiliq rabiye qadir xanimgha yetküzgen we shundaqla proféssor balmun ependige tibetlerning en'eniwi aq sharpisini sowgha qilghan.

Biz rabiye qadir xanimgha dalay lamaning salimini yetküzüsh we rabiye qadir xanimning mektupining qisqiche mezmunidin xewerdar bolush üchün rabiye qadir xanim bilen téléfon söhbiti élip barduq.