Rabiye qadir xanimning gérmaniye ziyariti netijilik axirlashti

2008 - Yili 20 - april küni bérlinda échilghan yighinda d u q reisi, uyghurlarning meniwi anisi rabiye qadir xanim échilish nutqi sözlidi.

 Bu ikki hepte ichide rabiye qadir xanim qurultay kün tertipide belgilen'gen pa'aliyetlerge qatnashqandin sirt gérmaniye, awistriye we shwétsariye qatarliq döletlerning yuqiri derijilik hökümet emeldarliri bilenmu uchrashti.

Gérmaniye hökümet emeldarliri rabiye xanimni qizghin qarshi aldi

Axirqi küni yene bawariye parlaméntida nutuq sözlep, bu qétimqi sepirige xatime bergen rabiye qadir xanim, bu qétimqi pa'aliyetlerning etrapliq we sistémiliq orunlashturulghanliqidin memnun bolghanliqini bildürdi.

Rabiye qadir xanimning bu qétimqi gérmaniye ziyariti xitay - gérmaniye otturisidiki sürkülüsh küchiyiwatqan, gérmaniye bash ministiri an'géla mérkél xanim we gérmaniye tashqi ishlar ministirliki re'isi dalay lamani qobul qilishtin ilgiri élip bérilghan bolup, rabiye qadir xanim gérmaniye hökümet emeldarlirining qizghin kütüwélishigha érishken. Bu seperde rabiye qadir xanimgha hemra bolghan d u q mu'awin re'isi esqerjan ependi, her sahe dölet erbablirining rabiye qadir xanimgha tutqan alahide mu'amilisi heqqide chüshenche bérip ötti.

Gérmaniye axbarat sahesi rabiye xanimni jiddiy diqqet étibarigha aldi

Rabiye qadir xanimning ziyariti qobul qilghan gérmaniye hökümet emeldarliri Uyghurlar mesilisige jiddiy mu'amile qilishning zörürlikini yenimu bir qedem ilgiriligen halda tonup yetken. Bolupmu, démokratik bir dölet bolush süpiti bilen gu'antanamodiki Uyghurlargha ige chiqalmaywatqanliqi üchün özlirini eyibligen .

Rabiye qadir xanimning ayiqi tekkenliki sheherde sheher bashliqliri we parlamént wekilliri rabiye qadir xanimni qizghin kütiwélipla qalmay, yene rabiye qadir xanimning sheripige ziyapetler bergen.

 19 - Apréldin bashlapla gérmaniye metbu'atliri, téléwiziye qanalliri we intérnét tor betliri rabiye qadir xanim toghrisida bes - beste melumatlar bérishke bashlighan idi. Rabiye qadir xanim bu sepiride köpligen hökümet emeldarlirining ziyaretlirini qobul qilipla qalmay, künige qanche sa'etlep her sahe muxbirlarning ziyaretlirinimu qobul qilghan.