Рабийә қадир ханим франсийә вә италийидә муһим сиясий паалийәтләргә қатнишиду

Сүрәт, рабийә қадир ханим башчилиқидики һәйәт италийиниң җәнуби тирол аптонум райуниниң парламәнтида зийарәттә.

5 ‏- Июл үрүмчи вәқәсидин кейин, хәлқара мәтбуатларда уйғурлар һәққидә һәмдә уйғур миллий һәрикитиниң рәһбири рабийә қадир ханимниң паалийәтлири тоғриисида берилгән мәлуматлар илгирикигә қариғанда пәвқуладдә дәриҗидә көп елан қилинмақта, шуниң билән тәң, уйғур миллий һәрикитиниң рәһбири рабийә қадир ханим яврупа әллиридики, америкидики һәр қайси шитат вә шәһәрләрдики, һөкүмәт органлири, сиясий партийиләр, хәлқара тәшкилатлар вә аммиви җәмийәтләр тәрипидин уюштурулған йиғин вә паалийәтләргә алаһидә меһман сүпитидә тәклип қилинмақта.

Буйил 10 ‏- айғичә рабийә қадир ханим, италийә, франсийә, шивитсийә, голландийә, белгийә, норвигийә, шивитсарийә, испанийә қатарлиқ дөләтләрдә җәми 22 қетим, америка ичидә 6 қетим өткөзөлгән паалийәтләргә қатнашқан болуп, рабийә ханим бир қисим дөләтләрдә уйғурлар дуч кәлгән сиясий зулум, болупму 5 ‏- июл үрүмчи вәқәсидә гунаһсиз өлтүрүлгән вә түрмиләргә ташланған уйғурлар һәққидә доклат аңлатса, йәнә бир қисим дөләтләрдә, рабийә қадир ханимниң һаяти тәсвирләнгән йәни пүтүн уйғурларға вәкиллик қилидиған һөҗҗәтлик сиясий филим "муһәббәтниң 10 шәрти" намлиқ филим көрситилгән филим фестиваллириға иштирак қилған.

Италийә вә франсийидә, рабийә қадир ханим айрим ‏- айрим 3 қетим зиярәттә болған болуп, бу қетим униң бир йил ичидә 4 ‏- қетим мәзкүр икки дөләттә зиярәттә болуши һесаблиниду.

Рабийә қадир ханимниң ярдәмчиси вә америка уйғур аяллири комитетиниң рәиси зүбәйрә ханим, рабийә қадир ханимниң франсийиниң лион шәһиридә елип бариидиған паалийәтлири һәққидә мәлумат бәрди.

Зубәйрә ханим йәнә, рабийә қадир ханимниң франсийидики 2 күнлүк зияритини ахирлаштуруп, 23 ‏- өктәбир күни италийиниң рим шәһиридә өткүзүлидиған "әркинлик марши" намлиқ паалийәткә муһим йетәкчи сүпитидә иштирак қилидиғанлиқини билдүрди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.