Atushta barliq Uyghur ashxana - réstoranlar xojayinliri ramizanda soda toxtatmasliq kapaletnamisigha mejburi qol qoydi

Uyghur diyarining melum shehiridiki melum bir réstoranning jiddi soda meshghuliyitidin bir körünüsh.

  Atushta yéqindin buyan barliq musulmanche réstoran hem ashxana xojayinliri xitay da'iriliri teripidin békitilgen ramzanda sodini toxtatmasliq kapaletnamisigha qol qoyushqa mejbur bolghan.

Musulmanlarning ulugh ramizan éyi yétip kélishi aldida turidu, yeni 2 - séntebirdin bashlap dunya musulmanliri bir ayliq roza tutushqa bashlaydu, bu mezgilde musulman ashxana réstoranlirimu asasen, normal tijaritini roza tutiwatqan musulman xéridarlargha maslashturup, bir ay zoluq yaki iptarliq waqtigha ülgürtüp tamaq chiqiridu,we yaki bir ay tijaritini toxtitip roza tutidu. Bu musulman eller üchün intayin normal hem eqelliy bir adet.

Halbuki atush shehride del buning eksiche, xitay da'iriliri musulman ashxana hem réstoranlarning ramizan mezgilide normal tijaret qilishigha kapaletlik qilish tedbirlirini almaqta iken.

Tinchliq torining 25 - awghust tarqatqan bir oqturushidin ashkarilinishiche, yéqinda atush sheher mehkimiside,atush sheherlik milliy ishlar komitéti, atush partkom birlik sépi, soda sana'et bashqurush idarisi, baj idarisi hemde her bir kocha bashqarmilirigha atush shehrining ramizan éyi mezgilidiki muqimliq xizmet yighini chaqirilghan bolup, yighinda mezkur orunlarning seperwerlikke kélip ikki kün ichide atush shehiridiki barliq chong kichik musulmanche ashxana hem réstoranlarning sanini élip chiqish, we mexsus adem ajritip her bir réstoran ashxana xojayinlirining ramizan mezgilide sodini toxtitip qoymasliq kapaletnamisigha qol qoydurushni ishqa ashurush tapshurulghan.

Uqturushta éytilishiche her bir musulmanche réstoran hem ashxanilarning roza mezgilide normal tijaret yürgüzishige kapaletlik qilishtin ibaret bu belgilime da'irilerning,béyjing olimpik hem méyiplar olimpiki dawamida atushning yaxshi obrazini saqlap atushning muqimliqini ashurushtiki tedbirining biri iken.

Atush shehride Uyghur réstoran hem ashxana xojayinlirining ramizan mezgilide normal soda qilishigha kapaletlik qilishtin ibaret belgilime heqqide hemde buning yürgüzülüshi toghrisida melumat élish üchün atush sheherlik hökümet ishxanisigha téléfon qilduq, emma dijorniliq qiliwatqan kadir so'alimizgha jawab bérishni ret qildi.

Seyshenbe küni dunya Uyghur qurultiyining bayanatchisi dilshat rishit ependi, dunya Uyghur qurultiyining atushta ramizan éyida élip bériwatqan bu xil tedbiridin xewer tapqanliqi, nöwette xitay da'irilirining Uyghur élining her qaysi jaylirida meschitlerge,diniy erbaplargha, musulmanlargha qaratqan nazaritini kücheytip, xizmetchi kadirlar, oqutquchi oqughuchilarning roza tutushini chekleydighan, tüzümge xilapliq qilghuchilarni qattiq jazalaydighan tüzümlerni békitip, diniy hem siyasiy jehette Uyghurlar üstidin élip bériwatqan basturushini jiddiyleshtüriwatqanliqini hetta atushtiki barliq Uyghur ashxana hem réstoran xojayinlirining roza mezgilide ishik taqimasliqqa kapalet bérishke mejburlinip, da'irilerning munasiwetlik höjjetlirige mejburi qol qoyuwatqanliqini, qol qoymighanlarning soda qilish resmiyetlirining da'iriler teripidin etkes qilinidighanliqini éytqan idi.
 
Atush da'irilirining musulmanche réstoran hem ashxanilargha qaratqan bu siyasitini qandaq emeliyleshtürüwatqanliqini heqqide tepsili melumat élish üchün atush shehiridiki réstoran hem ashxanilar bilen alaqilashtuq.

Atushtiki melum dangliq réstoranning méhman kütüshke mes'ul bir diréktori téléfon ziyaritimizni qobul qilip, xojayinning hazir yoqliqini emma baj idarisining bir qanche kün awal " ramizan mezgilide réstoranni taqashqa yol qoyulmaydighanliqi " toghrisidiki shundaq bir höjjetni kötürüp kelgenlikini éytti. Atushtiki yene bir Uyghur ashxanisimu téléfon ziyaritimizni qobul qildi.

Dilshat rishit atushta yolgha qoyuliwatqan bu xil tedbir munasiwiti bilen radi'omiz we bashqa xelq'araliq axbarat organlirigha bayanat bérip, "xitay hökümitining Uyghur élida ramizan harpisida muqimliqqa kapaletlik qilish bahanisida Uyghurlarning diniy étiqad erkinlikini chektin ashqan tedbirler bilen tosimaqta. Biz xitay da'irilirining tashqi dunyagha diniy erkinlikke hörmet qilimiz dep teshwiq qilip, emeliyette Uyghur musulmanliri üstidin diniy basturushini toxtatmay yenimu jiddiy dawamlashturiwatqanliqigha küchlük naraziliq bildürimiz. Dunya körüp turuptiki xitayning atushta élip bériwatqan tedbirlirining özila xitay hökümitining Uyghurlarning diniy étiqadni éghir depsende qiliwatqanliqini ispatlaydu," dédi.