«явропа шәрқий түркистан бирлики» ниң йеңи нөвәтлик рәһбәрлик һәйити сайлап чиқилди

13-январ күни германийиниң мюнхен шәһиридә «явропа шәрқий түркистан бирлики» ниң 19-нөвәтлик йиғини чақирилди һәмдә йеңи нөвәтлик рәһбәрлик һәйити сайлап чиқилди.
Ихтиярий мухбиримиз қутлан
2013-01-14
Елхәт
Пикир
Share
Принт
явропа шәрқий түркистан бирликиниң сайлам йиғинидин көрүнүш. 2013-Йили 13-январ, мюнхен.
Явропа шәрқий түркистан бирликиниң сайлам йиғинидин көрүнүш. 2013-Йили 13-январ, мюнхен.
RFA/Qutlan

Явропа шәрқий түркистан бирликиниң йеңидин сайланған рәиси әнвәрҗан әпәнди зияритимизни қобул қилип бу қетимқи сайлам йиғини һәққидә мәлумат бәрди. У бу қетимқи йиғинниң явропа шәрқий түркистан бирликиниң 19-нөвәтлик сайлам йиғини икәнликини, йиғинда йеңи нөвәтлик рәис вә рәһбәрлик һәйитиниң сайлап чиқилғанлиқини билдүрди. У явропа шәрқий түркистан бирликиниң бу қетимқи йиғин күнтәртипиниң дуня уйғур қурултийи тәркибидики тәшкилатларниң сайлам йиғинлири билән асасән охшашлиққа игә икәнликини тәкитлиди.

явропа шәрқий түркистан бирликиниң сайлам йиғинидин көрүнүш. 2013-Йили 13-январ, мюнхен.
Явропа шәрқий түркистан бирликиниң сайлам йиғинидин көрүнүш. 2013-Йили 13-январ, мюнхен. RFA/Qutlan

Әнвәрҗан әпәнди йәнә явропа шәрқий түркистан бирликиниң йеңидин сайланған рәһбәрлик һәйити һәққидә мәлумат берип, әнвәрҗан әпәндиниң рәисликкә сайланғанлиқини, нурмәмәт, һәбибулла қарим, рәна ханим қатарлиқ 9 кишиниң рәһбәрлик һәйитини тәшкил қилғанлиқини көрсәтти.

У явропа шәрқий түркистан бирликиниң тарихи һәмдә униң дуня уйғур қурултийиниң мәйданға келишидә ойниған роли һәққидә мунуларни баян қилди: «явропа шәрқий түркистан бирлики 1990-йили германийиниң мюнхен шәһиридә уйғур зиялийлири тәрипидин тунҗи қетим ғәрбтә қурулған тәшкилат. Бу тәшкилат өз нөвитидә йәнә дуня уйғур яшлири қурултийиниң мәйданға келишигә һәмдә 1999-йили шәрқий түркистан вә уйғуристан миллий қурултийиниң вуҗудқа келишигә саһибханилиқ қилған тәшкилат. 2003-Йилиниң ахириға барғанда мана мушу тәшкилатлар асасида пүтүн шәрқий түркистанлиқларниң миллий мәнпәити көздә тутулуп һазирқи дуня уйғур қурултийи қурулған. Шуңлашқа явропа шәрқий түркистан бирликини дуня уйғур қурултийини вуҗудқа кәлтүргән асасий түврүк дәп һесаблашқа болиду.»

Әнвәрҗан әпәнди ахирида явропа шәрқий түркистан бирликиниң бундин кейинки паалийәт пиланлири һәққидә тохтилип, алди билән бу тәшкилатниң германийидики уйғур җамаәтчиликиниң иҗтимаий, мәдәний, диний вә маарип җәһәтләрдики еһтияҗини қандурушқа тиришидиғанлиқини көрсәтти. Шуниң билән бир вақитта йәнә өз-ара бирлик иттипақлиқни асасий орунға қоюп, дуня уйғур қурултийиниң арқисида мустәһкәм туруп, уйғур дәвасиниң хәлқарада техиму үнүмлүк рәвиштә елип берилишиға һәссә қошидиғанлиқини көрсәтти.

Дуня уйғур қурултийи иҗраийә комитетиниң рәиси долқун әйса әпәндиму зияритимизни қобул қилип, явропа шәрқий түркистан бирлики билән дуня уйғур қурултийиниң мунасивити һәққидә тохталди. Униң көрситишичә, явропа шәрқий түркистан бирлики өз дәвридә һазирқи дуня уйғур қурултийини мәйданға кәлтүргән ғол тәшкилатларниң бири болуп, у дунядики һәрқайси әлләрдики 30 дин артуқ уйғур тәшкилатлири қатарида дуня уйғур қурултийиниң тәркибидә өз паалийәтлирини қанат яйдуридикән.

Долқун әйса йәнә явропа шәрқий түркистан бирликиниң барлиқ паалийәтлириниң дуня уйғур қурултийиниң низамнамиси һәмдә һәрикәт принсиплири асасида елип берилидиғанлиқини, болупму дуня уйғур қурултийи чиқарған қарарларниң германийидә уйғунлишишида муһим рол ойнайдиғанлиқини тәкитлиди. Шуниң билән биргә явропа шәрқий түркистан бирликиниң германийидики уйғур җамаәтчилики билән германийә һөкүмити вә парламенти оттурисида васитичилик вәзиписини артқузуп, уйғур дәвасиниң германийидә оңушлуқ елип берилиши һәмдә дуня уйғур қурултийиниң кәлгүсидики хизмәтлириниң йүрүшүшидә көврүклүк рол ойнайдиғанлиқини әскәртип өтти.

Пикирләр (0)
Share
Толуқ бәт