“Yawropa sherqiy türkistan birliki” ning yéngi nöwetlik rehberlik hey'iti saylap chiqildi

13-Yanwar küni gérmaniyining myunxén shehiride “Yawropa sherqiy türkistan birliki” ning 19-nöwetlik yighini chaqirildi hemde yéngi nöwetlik rehberlik hey'iti saylap chiqildi.
Ixtiyariy muxbirimiz qutlan
2013.01.14
Share on WhatsApp
Share on WhatsApp
yawropa-sherqiy-turkistan-birliki-saylam-305.JPG Yawropa sherqiy türkistan birlikining saylam yighinidin körünüsh. 2013-Yili 13-yanwar, myunxén.
RFA/Qutlan

Yawropa sherqiy türkistan birlikining yéngidin saylan'ghan re'isi enwerjan ependi ziyaritimizni qobul qilip bu qétimqi saylam yighini heqqide melumat berdi. U bu qétimqi yighinning yawropa sherqiy türkistan birlikining 19-nöwetlik saylam yighini ikenlikini, yighinda yéngi nöwetlik re'is we rehberlik hey'itining saylap chiqilghanliqini bildürdi. U yawropa sherqiy türkistan birlikining bu qétimqi yighin küntertipining dunya Uyghur qurultiyi terkibidiki teshkilatlarning saylam yighinliri bilen asasen oxshashliqqa ige ikenlikini tekitlidi.

Yawropa sherqiy türkistan birlikining saylam yighinidin körünüsh. 2013-Yili 13-yanwar, myunxén.
Yawropa sherqiy türkistan birlikining saylam yighinidin körünüsh. 2013-Yili 13-yanwar, myunxén.
RFA/Qutlan

Enwerjan ependi yene yawropa sherqiy türkistan birlikining yéngidin saylan'ghan rehberlik hey'iti heqqide melumat bérip, enwerjan ependining re'islikke saylan'ghanliqini, nurmemet, hebibulla qarim, rena xanim qatarliq 9 kishining rehberlik hey'itini teshkil qilghanliqini körsetti.

U yawropa sherqiy türkistan birlikining tarixi hemde uning dunya Uyghur qurultiyining meydan'gha kélishide oynighan roli heqqide munularni bayan qildi: “Yawropa sherqiy türkistan birliki 1990-yili gérmaniyining myunxén shehiride Uyghur ziyaliyliri teripidin tunji qétim gherbte qurulghan teshkilat. Bu teshkilat öz nöwitide yene dunya Uyghur yashliri qurultiyining meydan'gha kélishige hemde 1999-yili sherqiy türkistan we Uyghuristan milliy qurultiyining wujudqa kélishige sahibxaniliq qilghan teshkilat. 2003-Yilining axirigha barghanda mana mushu teshkilatlar asasida pütün sherqiy türkistanliqlarning milliy menpe'iti közde tutulup hazirqi dunya Uyghur qurultiyi qurulghan. Shunglashqa yawropa sherqiy türkistan birlikini dunya Uyghur qurultiyini wujudqa keltürgen asasiy tüwrük dep hésablashqa bolidu.”

Enwerjan ependi axirida yawropa sherqiy türkistan birlikining bundin kéyinki pa'aliyet pilanliri heqqide toxtilip, aldi bilen bu teshkilatning gérmaniyidiki Uyghur jama'etchilikining ijtima'iy, medeniy, diniy we ma'arip jehetlerdiki éhtiyajini qandurushqa tirishidighanliqini körsetti. Shuning bilen bir waqitta yene öz-ara birlik ittipaqliqni asasiy orun'gha qoyup, dunya Uyghur qurultiyining arqisida mustehkem turup, Uyghur dewasining xelq'arada téximu ünümlük rewishte élip bérilishigha hesse qoshidighanliqini körsetti.

Dunya Uyghur qurultiyi ijra'iye komitétining re'isi dolqun eysa ependimu ziyaritimizni qobul qilip, yawropa sherqiy türkistan birliki bilen dunya Uyghur qurultiyining munasiwiti heqqide toxtaldi. Uning körsitishiche, yawropa sherqiy türkistan birliki öz dewride hazirqi dunya Uyghur qurultiyini meydan'gha keltürgen ghol teshkilatlarning biri bolup, u dunyadiki herqaysi ellerdiki 30 din artuq Uyghur teshkilatliri qatarida dunya Uyghur qurultiyining terkibide öz pa'aliyetlirini qanat yayduridiken.

Dolqun eysa yene yawropa sherqiy türkistan birlikining barliq pa'aliyetlirining dunya Uyghur qurultiyining nizamnamisi hemde heriket prinsipliri asasida élip bérilidighanliqini, bolupmu dunya Uyghur qurultiyi chiqarghan qararlarning gérmaniyide uyghunlishishida muhim rol oynaydighanliqini tekitlidi. Shuning bilen birge yawropa sherqiy türkistan birlikining gérmaniyidiki Uyghur jama'etchiliki bilen gérmaniye hökümiti we parlaménti otturisida wasitichilik wezipisini artquzup, Uyghur dewasining gérmaniyide ongushluq élip bérilishi hemde dunya Uyghur qurultiyining kelgüsidiki xizmetlirining yürüshüshide köwrüklük rol oynaydighanliqini eskertip ötti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.