Русийә тақирбашлар гурупписиниң бир қисим каттивашлири җазалиниш алдида

 Русийиниң интерфакис агентлиқиниң хәвәр қилишичә, русийә тәптиш мәһкимисиниң қармиғидики тәкшүрүш гурупписи москва тақирбашлириниң бир җинайи шайкисиниң қилмишлири үстидә тәкшүрүш елип бериш арқилиқ уларниң 20 адәмни өлтүргәнлики вә 12 қетим адәм өлтүрүшкә урунғанлиқини ениқлап, уларниң җинайәт қилмишини бекитишкә сунған.

Тақирбашлар әзалириниң һәммиси дегүдәк 17 яштин 22 яшқичә болған яшлар

Мәзкур тәкшүрүш гурупписиниң вәкили владимир маркинниң ейтишичә, москвада сәккиз айдин бери һәрикәт қиливатқан тақирбашларниң тоққуз кишилик җинайи гурупписиниң әзалириниң һәммиси дегүдәк 17 яштин 22 яшқичә болған яшлар болуп, уларниң башлиқлири 18 яшлиқ артур рино вә павил скачевскийлардур. Булар өткән йили бир 45 яшлиқ әрмән кишини өлтүрүш билән әйиблинип тутулған болуп, сорақ қилиш җәрянида артур исимлик бу тақирбаш өзиниң 37 адәмни өлтүрүш үчүн көрсәтмә бәргәнликини иқрар қилған.

Хәвәрдә көрситилишичә, тақирбашларниң мәзкур җинайи гурупписиниң башлиқи өз иқрарида немә үчүн мундақ җинайәтләрни садир қилғанлиқини ейтип, өзиниң оттура мәктәптә оқуп йүргән чағлиридин тартипла, москваға келип русларни сиқип чиқириватқан "кавказлиқлар вә асиялиқларни өч көридиғанлиқи" билдүргән һәмдә москвадики черкизовский базирида рус милләтчилириниң базарда тоққуз адәмниң җениға замин болған партлитиш җинайити елип барғанда, өзиниңму биринчи қетим җинайәт садир қилғанлиқини ейтқан, тәкшүргүчиләр униң бу дело билән мунасивити болушини пәрәз қилишқан.

Ким тақирбашларниң һуҗум нишани?

Русийә мәтбуатлири русийидики тақирбашларниң саниниң 60 миңдин 70 миңғичә икәнлики һәққидики учурларни елан қилди. Тақирбашлар асаслиқи москва, петирбург шәһәрлиридин башқа йәнә русийиниң һәммә йәрлиригә тарқалған . Москва, уларниң асаслиқ базиси.

Русийиниң "нәвсру" учур ториниң йезишичә, тақирбашларниң асаслиқ һуҗум нишани оттура асиялиқлардин ибарәт болуп, москвадики қанун һимайичиси александир бродниң ейтишичә, бу йил январдин башлап, русийидә 152 қетим адәмләргә һуҗум қилиш вәқәси йүз берип, нәтиҗидә, 69 адәм өлгән, 170 адәм яриландурулған. Өлгәнләрниң 12си өзбек, тоққузи қирғиз, алтиси таҗиктـур. Мәзкур қанун һимайичиси йәнә, тақирбашларниң асаслиқ һуҗум қилиш нишаниниң оттура асия җумһурийәтлиридин кәлгәнләр икәнликини җәзимләштүргән.

Милләтчилик күчәймәктә

Тақирбашлар вә радикал милләтчилик гуруппилири совет иттипақи йимирилгәндин кейин мәйданға кәлгән йеңилиқ. Русийидики милләтчилик, ериқчилиқ кәйпиятлири йеқинқи йиллардин бери күчийип кәткән болуп, нөвәттә радикал фашист милләтчиләр очуқ ашкара башқа милләтләрни чәткә қақидиған һәмдә уларни русийидин қоғлашқа чақиридиған тәшвиқатларни һәмдә қилмишларни давамлаштурмақта. Бу милләтчи яшлар түрлүк партийиләргә уюшқан болуп, "русийә пәқәтла руслар үчүн", "русийидә пәқәт русларла яшаш керәк," дәйдиған идийини тәрғип қилишмақта.

Радикал милләтчиләр вә тақирбашларниң йирақ шәрқ райони һәм москвада даим хитайлар, оттура асиялиқлар, кавказлиқлар шуниңдәк башқа қара чачлиқ милләт вәкиллиригә җисманий һуҗум қилиш, һақарәтләш вәқәлири йүз бәргәнлики хәлқара инсан һоқуқи тәшкилатлириниңму диққитини тартқан болуп, бу мәсилә бойичә көп қетим русийини тәнқид қилған һәтта оттура асия рәһбәрлириму бу мәсилини русийә рәһбәрлиригә қойған иди.

Хәвәрләрдин қариғанда, йеңи президент медведев һакимийәткә чиққандин буян тақирбашларниң җинайи қилмишлириға қарши һәрикәтләр башланған болуп, бу қетим русийә әдлийә органлириниң тақирбашлар бандит гурупписи үстидин җинайәт турғузуши бир илгириләш болуп һесаблинидикән.