Rusiye taqirbashlar guruppisining bir qisim kattiwashliri jazalinish aldida

Yéqinda moskwa saqchilirining bir qanche yillardin buyan moskwa qatarliq sheherlerde pa'aliyet élip bériwatqan taqirbashlar dep atalghan rus milletchi yashlirining bir guruppisini qolgha chüshürgenliki hemde ularning kattibashlirining éniqlinip qolgha élin'ghanliqi xewer qilin'ghan idi.
Muxbirimiz ümidwar xewiri
2008-06-30
Share

 Rusiyining intérfakis agéntliqining xewer qilishiche, rusiye teptish mehkimisining qarmighidiki tekshürüsh guruppisi moskwa taqirbashlirining bir jinayi shaykisining qilmishliri üstide tekshürüsh élip bérish arqiliq ularning 20 ademni öltürgenliki we 12 qétim adem öltürüshke urun'ghanliqini éniqlap, ularning jinayet qilmishini békitishke sun'ghan.

Taqirbashlar ezalirining hemmisi dégüdek 17 yashtin 22 yashqiche bolghan yashlar

Mezkur tekshürüsh guruppisining wekili wladimir markinning éytishiche, moskwada sekkiz aydin béri heriket qiliwatqan taqirbashlarning toqquz kishilik jinayi guruppisining ezalirining hemmisi dégüdek 17 yashtin 22 yashqiche bolghan yashlar bolup, ularning bashliqliri 18 yashliq artur rino we pawil skachéwskiylardur. Bular ötken yili bir 45 yashliq ermen kishini öltürüsh bilen eyiblinip tutulghan bolup, soraq qilish jeryanida artur isimlik bu taqirbash özining 37 ademni öltürüsh üchün körsetme bergenlikini iqrar qilghan.

Xewerde körsitilishiche, taqirbashlarning mezkur jinayi guruppisining bashliqi öz iqrarida néme üchün mundaq jinayetlerni sadir qilghanliqini éytip, özining ottura mektepte oqup yürgen chaghliridin tartipla, moskwagha kélip ruslarni siqip chiqiriwatqan "kawkazliqlar we asiyaliqlarni öch köridighanliqi" bildürgen hemde moskwadiki chérkizowskiy bazirida rus milletchilirining bazarda toqquz ademning jénigha zamin bolghan partlitish jinayiti élip barghanda, öziningmu birinchi qétim jinayet sadir qilghanliqini éytqan, tekshürgüchiler uning bu délo bilen munasiwiti bolushini perez qilishqan.

Kim taqirbashlarning hujum nishani?

Rusiye metbu'atliri rusiyidiki taqirbashlarning sanining 60 mingdin 70 mingghiche ikenliki heqqidiki uchurlarni élan qildi. Taqirbashlar asasliqi moskwa, pétirburg sheherliridin bashqa yene rusiyining hemme yerlirige tarqalghan . Moskwa, ularning asasliq bazisi.

Rusiyining "newsru" uchur torining yézishiche, taqirbashlarning asasliq hujum nishani ottura asiyaliqlardin ibaret bolup, moskwadiki qanun himayichisi aléksandir brodning éytishiche, bu yil yanwardin bashlap, rusiyide 152 qétim ademlerge hujum qilish weqesi yüz bérip, netijide, 69 adem ölgen, 170 adem yarilandurulghan. Ölgenlerning 12si özbék, toqquzi qirghiz, altisi tajiktـur. Mezkur qanun himayichisi yene, taqirbashlarning asasliq hujum qilish nishanining ottura asiya jumhuriyetliridin kelgenler ikenlikini jezimleshtürgen.

Milletchilik kücheymekte

Taqirbashlar we radikal milletchilik guruppiliri sowét ittipaqi yimirilgendin kéyin meydan'gha kelgen yéngiliq. Rusiyidiki milletchilik, ériqchiliq keypiyatliri yéqinqi yillardin béri küchiyip ketken bolup, nöwette radikal fashist milletchiler ochuq ashkara bashqa milletlerni chetke qaqidighan hemde ularni rusiyidin qoghlashqa chaqiridighan teshwiqatlarni hemde qilmishlarni dawamlashturmaqta. Bu milletchi yashlar türlük partiyilerge uyushqan bolup, "rusiye peqetla ruslar üchün", "rusiyide peqet ruslarla yashash kérek," deydighan idiyini terghip qilishmaqta.

Radikal milletchiler we taqirbashlarning yiraq sherq rayoni hem moskwada da'im xitaylar, ottura asiyaliqlar, kawkazliqlar shuningdek bashqa qara chachliq millet wekillirige jismaniy hujum qilish, haqaretlesh weqeliri yüz bergenliki xelq'ara insan hoquqi teshkilatliriningmu diqqitini tartqan bolup, bu mesile boyiche köp qétim rusiyini tenqid qilghan hetta ottura asiya rehberlirimu bu mesilini rusiye rehberlirige qoyghan idi.

Xewerlerdin qarighanda, yéngi prézidént médwédéw hakimiyetke chiqqandin buyan taqirbashlarning jinayi qilmishlirigha qarshi heriketler bashlan'ghan bolup, bu qétim rusiye edliye organlirining taqirbashlar bandit guruppisi üstidin jinayet turghuzushi bir ilgirilesh bolup hésablinidiken.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet