Rusiye yéngi prézidént médwédéw dewrige kirdi

7 - May, bügün moskwada yéngi prézidént dmitriy médwédéwning qesem bérip wezipe tapshuruwélish murasimi ötküzülüp, putinning 8 yilliq prézidéntliq dewrige xatime bérildi.

 Putin krémil sariyidiki ishxanisini 42 yashliq dmitriy médwédéwqa ötküzüp berdi. Emma, mezkur yéngi prézidént shu künila putinni bash ministirliqqa körsetken.

Qesemyad murasimi

Sowét ittipaqi parchilan'ghandin kéyinki 17 yilliq rusiye siyasiy tarixi bügün yéngi sehipe bilen yézildi. 70 Yilliq sowét impériyisini gholitip, rusiye tarixidiki tunji prézidént bolghan boris yéltsindin kéyin textke chiqip, 8 yil bu döletni idare qilghan 55 yashliq wladimir putin charshenbe küni prézidéntliq hoquqini dmitriy médwédéwqa tapshurdi.

Bu yil 3 - ayda prézidéntliqqa saylan'ghan dmitriy médwédéwning qesem bérip, wezipe tapshuruwélish murasimi 7 - may küni krémil sariyidiki andréyéwskiy zalida ötküzüldi.

Rusiyining "newsru" uchur torining xewer qilishiche, rusiye bayraqliri ésilghan, rusiyining en'eniwi herbiy formisini kiygen hörmet qarawulliri qoghdawatqan karidordin ötken dmitriy médwédéw andréyéwskiy zaligha kirip kelgende ikki terepke toplan'ghan murasim qatnashquchilirining güldüras alqishliri hem muzika sadaliri ichide téz qedem tashlap, munberge chiqti hemde putinning qisqa sözidin kéyin, bir qolida rusiye asasiy qanuni tutup turup, " qesem bérimenki, rusiye fédératsiyisining prézidéntliq wezipisini atqurush jeryanida puqralarning erkinliki, hoquqlirini hörmet qilimen hem qoghdaymen, rusiye fédératsiyisining asasiy qanunini qoghdaymen, rusiyining musteqilliqi, bixeterliki we zémin pütünlükini qoghdap, xelq üchün sadaqetmenlik bilen xizmet qilimen" dep qesemyad qildi.

Prézidént dmitriy médwédéw nuqtida yene, u özining 8 yilliq möhlet ichide toplan'ghan küchlük asasqa tayinip turup, rusiyini dunyadiki qudretlik dölet qilip qurup chiqidighanliqini jakarlap, " rusiyini dunyadiki qudretlik dölet qilip qurup chiqish bizning istratégiyimiz we bizning buningdin kéyinki siyasiy yönilishimiz" deydu. U yene döletning qanun - tüzümlirini chingitip, chiriklikke zerbe béridighanliqi hemde xelqning turmush parawanliqini kapaletke ige qilidighanliqini tekitligen.

 Qesem bérish murasimida sabiq prézidént putinmu qisqa nutuq sözlep, médwédéwning uning 8 yildin buyan dawamlashturup kéliwatqan siyasitini dawamlashturidighanliqini eskertish bilen birge özining 8 yil ichidiki siyasetlerning toghra bolghanliqini hemde bu qétimqi hoquq tapshurushning rusiye üchün nahayiti muhim qedem ikenlikini tekitlep, médwédéwqa utuq tileydighanliqini bildürdi.

"8 Yil ilgiri men birinchi qétim prézidéntliqqa qesem bergendin buyan ochuq ashkara, semimiy hem sadaqetmenlik bilen xelq hem dölet üchün xizmet qilish mejburiyitini zimmemge alghan idim. Men özemning bu wedilirige xilapliq qilmidim" deydu putin sözide. Qesem bérish murasimigha 2000din artuq méhman qatnashqan.

Médwédéw rusiye tarixidiki yash prézidént

Médwédéw rusiyining boris yéltsin, wladimir putindin kéyinki 3 - prézidénti shuningdek 1917 - yilidin kéyinki pütün rusiye tarixidiki eng yash prézidént bolup hésablinidu. U, bu yil 42 yashqa kirgen bolup, uzun mezgil sanktpétérburg hökümitide wladimir putin bilen birge ishligen, memliket boyiche chong soda - sana'et shirketlirini bashqurghan hemde putin teripidin mu'awin bash ministir wezipisige teyinlen'gen idi.

Médwédéw ötken yili putin teripidin özining izbasari süpitide élan qilin'ghandin kéyin, bu yil 3 - aydiki saylamda ghelibe qazinip, %70 awaz bilen prézidéntliqqa saylan'ghan idi.

Xitay médwédéwni qarshi aldi

Dmitriy médwédéwni tunji bolup, xitay re'isi xu jintaw tebrikligen bolup, shinxu'aning xewer qilishiche, xu jintaw tebriknamiside médwédéwni tebriklesh bilen birge yene junggo bilen rusiyining chong qoshna döletler ikenliki, ularning özara istratégiyilik munasiwetlirining dawamliq küchiyiwatqanliqi hemde buning ikki dölet xelqlirining menpe'etlirige uyghun ikenlikini tekitlesh bilen birge özining buningdin kéyin dawamliq türde uning bilen hemkarliship, junggo - rusiye istratégiyilik munasiwetlirini téximu yuqiri sewiyige kötürüshke tirishidighanliqini tekitligen.

Médwédéw shu küni putinning bash ministir namzati ikenlikini jakarlidi

Rusiye prézidént axbarat idarisining xewer qilishiche, yéngi prézidént dimitriy médwédéw shu künila wladimir putinni birinchi nöwetlik bash ministir namzati qilip körsetken. Eger médwédéw prézidént bolsa, wladimir putinning bash ministiri bolidighanliqi ilgirila békitilip bolun'ghan bolup, buni hetta médwédéw özimu biwasite bildürgen idi.

Démek, rusiye asasiy qanuni boyiche 3 - qétim prézidént bolush mumkinchiliki bolmighanliqigha qarimay, putin emdi bash ministirliq salahiyiti bilen prézidént médwédéw bilen birlikte rusiyini idare qilishi mumkin. Közetküchiler hetta, rusiyining ichki - tashqi siyasiti yenila médwédéwqa qarighanda, putin bilen bekrek baghliq bolup qélishi mumkinlikini otturigha qoyushmaqta.

Médwédéwmu putinning ichki - tashqi siyasetlirining dawamlishidighanliqini izchil tekitligen idi. Qarighanda, médwédéw dewride rusiyining xitaygha qaratqan siyasetliri putin dewrige oxshash halda dawamlishidu, jümlidin rusiyining Uyghurlar mesilisidiki meydanida özgirish bolmasliqi mumkin.