Sa'adet partiyisi ayallar bölümi xitay we kambudzhagha qarshi bayanat élan qilish yighini ötküzdi

Süret, 2009 ‏- yili 12 ‏- ayning 31 ‏- küni türkiye saadet partiyisining ayallar bölümi bilen sherqi türkistan maarip we hemkarliq jemiytining ayallar bölümining birlikte uyushturushida istanbulning eyup sultan meydanida ötküzülgen xitay we kambudzhagha qarshi bayanat élan qilish yighinidin bir körünüsh.

2009 ‏- Yili 12 ‏- ayning 31 ‏- küni türkiye sa'adet partiyisining ayallar bölümi bilen sherqi türkistan ma'arip we hemkarliq jem'iytining ayallar bölümining birlikte uyushturushida istanbulning eyup sultan meydanida xitay we kambudzhagha qarshi bayanat élan qilish yighini ötküzüldi. Yighin'gha sa'adet partiyisi we sherqiy türkistan ma'arip we hemkarliq jem'iytining mes'ulliri we sa'adet partiyisining ayallar bölümi ezaliri shundaqla istanbulda yashawatqan Uyghur ayallardin bolup yüzdin artuq ayallar ishtirak qildi.

Axbarat élan qilish yighinigha köpligen muxbirlarmu kelgen bolup, yighinda sherqiy türkistan ma'arip we hemkarliq jem'iytining re'isi hidayetullah oghuzxan we sa'adet partiyisi ayallar bölümining re'isi nagéxan'gul eslitürk söz qildi.

Sa'adet partiyisining ayallar bölümining re'isi nagéxan'gul eslitürk sözide xitay we kambudzhani eyiblep mundaq dédi: " hemmimizge melum bolghandek, sherqiy türkistanning ürümchi shehiride ötken 7 ‏- ayda yüz bergen weqelerdin kéyin kambudzhagha qachqan 21 neper Uyghur türki béyjingning bésim qilishi netijiside xitaygha qayturuldi. Kambudzha 1951 ‏- yili xelq'ara musapirlarni qoghdash kélishimnamige imza qilghan jenubiy asiya döletliridin biri bolsimu, kambudzhaning paytexti phnom pénih diki birleshken döletler teshkilatining musapirlar ishxanisidin siyasiy panahliq telep qilghan Uyghurlarni dölet ichidin chiqardi. Xitay mu'awin dölet re'isining kambudzhani ziyaret qilishi bilen , xitay emeldarliri ularning jinayetchi ikenlikige ispat körsitelmigen bolsimu, bu qanunsiz ish emeliyleshturuldi. Kambudzhagha eng köp meblegh salghan xitay bu döletni 850 milyon dollar miqdaridiki 14 türlük kélishimge imza qilish bilen mukapatlidi. Kapitalist dunya séstimida xelq'ara qanun heqqide döletler teripidin imza qilin'ghan kélishimning ijra qilinmastin qeghez üstidila qalghanliqini körüwatimiz."

Nagéxan'gul eslitürk b d t we xelq'ara islam qurultéyi teshkilatigha xitap qilip mundaq dédi: " birleshken döletler teshkilati musapirlar ishxanisining bu yüz bergen weqelerge, din, irq, siyasiy chüshenche we jinsiyet ayrimastin terepsiz bir shekilde, siyasiy panahliq telep qilghan musapirlargha we bashqa insanlargha éhtiyaj tuyulghanda, qoghdash we yardem qilish wezipisini orunlimighanliqini körüwatimiz. Igilinishiche ,xitayda her yili 5 mingdin artuq kishining ölümge höküm qilinidighanliqi bildürülmekte. Dunyadiki ölümge höküm qilishning yüzde 87% pirsenti xitayda ishlen'genliki ilgiri sürülmekte. Biz sa'adet partiyisi ayallar bölümi bolush süpitimiz bilen türkiyidin qalsa eng köp Uyghur musulmanlar yashaydighan sherqiy türkistan bilen munasiwetlik hökümet mes'ullirini, islam qurultéyi teshkilatini, birleshken döletler teshkilatini we xelq'ara teshkilatlarni bu ishqa arilishishqa chaqiriq qilimiz, ammiwiy teshkilatlirimizni we millitmizni bu mesilige sezgürlük bilen qarashqa chaqiriq qilimiz. Uyghurlarni delil ‏- ispatsiz ölümge höküm qilghan xitay dölitini we Uyghurlarni dölet tewelikidin mejburiy chiqarghan kambudzhani qattiq eyibleymiz we bu zulumning toxtishini telep qilimiz."

Biz yighin axirida sherqiy türkistan ma'arip we hemkarliq jem'iytining re'isi hidayetullah ependi bilen söhbet élip barduq.

Yuqiridiki awaz ulinishidin, bu söhbitimizning tepsilatini anglaysiler.