Сәуди әрәбистан армийисидә хизмәт ишлигән уйғур ‏- муһәммәд рәһмәтулла

Уйғурлар өзлирииниң садақәтмәнлики вә ихласи билән барғанлики дөләттә, шу дөләт игилириниң ишәнчисигә вә һөрмитигә еришип кәлгән бир чивәр хәлқ. Уйғурлардин пакистан, сәуди әрәбистани, түркийә вә башқиму дөләтләрдә юқири мәртибиләргә еришкәнләр вә дөләт армийиси тәркибигә кириштәк муһим орунларда хизмәт қилғанларму көп.
Мухбиримиз өмәрҗан тохти
2009.04.29

Сәуди әрәбистаниниң дөләт армийиси сепигә кирип, мундин 60 йиллар илгири пәләстин - исраилийә урушиға қатнашқан муһәммәд рәһмәтулла акиму шуларниң җүмлисидин санилиду.

Муһәммәд рәһмәтулла ака 1917 - йили уйғур елиниң шаһяр наһийисидә дуняға кәлгән болуп, сәуди әрәбистаниға кичик йешида, аилиси билән бирликтә көчүп чиққан икән. Һазир бу киши 92 яшқа кирип қалған, сәуди әрәбистаниниң җиддә шәһиридә истиқамәт қилип кәлмәктә.

Нөвәттә рәһмәтулла ака бизниң сөһбитимизни қобул қилған иди.

Рәһмәтулла ака билән сөһбәт

Рәһмәтулла ака өзини тонуштуруп мундақ диди:" мән 1948 - йили пәләстин - исраилийә урушиға қатнишиш үчүн 350 кишилик сәуди әрәбистани армийиси тәркибидә, пәләстинниң ғәззә шәһиригә бардуқ, у җайда үч йил турдуқ. Уруш ахирлашқандин кейин, сәуди әрәбистаниға қайтип келип, аввал сәуди әрәбистаниниң мәккә мукәррәмә шәһиридики сақчи идарисида 4 йил ишлидим. Униңдин кейин сәуди әрәбистан авиатсийә ширкитидә йигирмә йил хизмәт қилип дәм елишқа чиқтим. Айропилан енжинирлиқида биринчи дәриҗилик шаһадитим бар. Һазир 92 яшқа кирдим, төт пәрзәнтим вә йигирмә нәврәм бар."

Муһәммәд рәһмәтулла акиниң шөһрити

Муһәммәд рәһмәтулла акиниң ейтишичә, сәуди әрәбистан гезит, журналлиридә рәһмәтулла акиниң тәрҗимиһали та һазирғичә тонуштурулуп кәлгән.

Мәсилән "әл мәдинә" гезитиниң 2000 - йили 13 - ноябир санида, муһәммәд рәһмәтулла акиниң 1948 - йили пәләстинниң ғәззә районида, һәрби формиси билән чүшкән сүрити билән һазирқи сүрити бирликтә " уруш йиллиридин қалған түркистанлиқ җәңчи" дегән темида мақала елан қилинған. Йәнә "оказ"гезитиниң 2008 - йили 11 - април санида" армийә сепидики әң пишқәдәм җәңчи" дегән темида, униң тәрҗимиһали елан қилинған.

2009 - Йили 5 - април күни сәуди әрәбистаниниң"иқрә" телевизийә қанили муһәммәд рәһмәтулла ака билән сөһбәт өткүзгән. Сәуди әрәбистани һөкүмитиму бу яшинип қалған уйғур җәңчигә алаһидә илтипат көрситип кәлмәттә икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.