Almatada ataqliq meripetchi sawut kibirof xatirilendi

28 - Séntebir küni almata shehiri abdulla rozibaqiyéf namidiki 153 - gimnaziyide ataqliq meripetchi, péshqedem ustaz sawut kibirofni 100 yashqa tolush munasiwiti bilen xatirilesh pa'aliyiti ötküzüldi.
Ixtiyari muxbirimiz oyghan
2012-09-28
Share


S. Kibirof perzentliri hem gimnaziye kolléktipining uyushturushi bilen ötken mezkur murasimgha awézof nahiyilik hakimchiliqi, jumhuriyetlik Uyghur étno - medeniyet merkizi wekilliri, ziyaliylar, ustazlar, oqughuchilar qatnashti. Uningda sözge chiqquchilar s.Kibirofning milliy ma'ariptiki rolini hem uning insaniy peziletlirini alahide tekitlidi. Murasimda shundaqla gimnaziye oqughuchiliri teripidin teyyarlan'ghan konsért programmisi körsitildi.

S. Kibirof 1912 - yili almata wilayitining hazirqi talghir shehiride dunyagha kelgen bolup, 1935 - yili almatadiki pédagogika téxnikomini tamamlighan hem sheherlik 17 - mektepte özining ustazliq pa'aliyitini bashlighan. U Uyghur xelqining munewwer perzendi abdulla rozibaqiyéf qatarliq shexsler bilen yéqin munasiwette bolghan hemde ularning teklipi bilen hazirqi talghir nahiyisining qizil gheyret yézisi ottura mektipining mudiri bolup belgilen'gen. U sowét élide bashlan'ghan siyasiy teqibleshler qurbanigha aylinip, 1937 - yildin ta 1947 - yilghiche türme azablirini béshidin ötküzgen. Andin erkinlikke chiqip, hazirqi dostluq mehellisining ottura mektipide ishligen, emma adaletsiz eyibleshler yenila dawam qilip, ta 1958 - yilghiche sirt rayonlarda ishleshke mejbur bolghan. 1958 - Yili u toluq aqlinip, hazirqi talghir nahiyisining tuzdibastaw yézisining mektipide, andin uzaq waqit mabeynide almata shehiri dostluq mehellisining ottura mektipide ustazliq qilghan hem Uyghur milliy mektipining shekillinishige munasip töhpisini qoshqan.

S.Kibirofning 40 yilliq pédagogikiliq pa'aliyiti hökümet teripidin yuqiri bahalinip, u bir nechche médallar we pexri yarliqlar bilen teqdirlen'gen idi. Bügünki tangda kibiroflar ewladi milliy ma'aripning rawajlinishigha özlirining hessisini qoshmaqta hemde a. Rozibaqiyéf namidiki gimnaziyining köpligen pa'aliyetlirige hamiyliq qilmaqta.

Radi'omiz ziyaritini qobul qilghan péshqedem ustaz xasiyet yüsüpowa bu heqte öz qarashlirini otturigha qoydi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet