Сәуди әрәбистанида уйғурлар тонуштурулди

Сәуди әрәбистанида рамзан мунасивити билән уюштурулған кечилик паалийитидә уйғурларниң һазирқи вәзийити тәпсилий тонуштурулди.
Ихтиярий мухбиримиз өмәрҗан
2012-08-06
Share
seudi-jidde-ramzan-305.jpg Рамзан мунасивити билән уюштурулған кечилик паалийитидә уйғурларниң һазирқи вәзийити тәпсилий тонуштурулди. 2012-Йили 2-авғуст, сәуди.
RFA/Omerjan

Сәуди әрәбистанидики байлардин мәрһум абдуғуфур әминниң оғли әмин абдуғуфур һаҗим һәр йили рамзан ейи мунасивити билән рамзан кечилириниң биридә дуняниң һәр қайси җайлиридин кәлгән алим вә мутәпәккурларни өз өйигә чақирип зияпәт бериш вә шу пурсәт билән уйғурларни вә уйғурларниң ана вәтинини тонуштуруш паалийитини йолға қойған болуп, бир қанчә он йилдин бири бу паалийәт мушундақ давам қилип кәлмәктә.

2012-Йили 2-авғуст күни өткүзүлгән кечилик паалийитидә, истанбулдики “шәрқий түркистан маарип вә һәмкарлиқ җәмийити” ниң қурғучиси тонулған алим абдулһәким мәхсум нутуқ сөзлиди.

Абдулһәким мәхсум нутқида өзини тонуштурғандин кейин, мундақ деди: “қәдирлик җамаәт мән сөзүмни узатмаймән, шәрқий түркистанни силәр яхши билисиләр. Һазир пәләстиндә болуватқанлар шәрқий түркистандикисидин нәччә миң һәссә яхши. Пәләстиндә болғанларни силәр аңлап турисиләр, әмма түркистанда болғанлирини аңлимайсиләр вә көрмәйсиләр. У җайда дин оқуғанлиқи вә қуран өгәнгәнлики сәвәблик яш балилар түрмиләргә ташлиниватиду.

Яшлиримизда исламға болған қизиқиш наһайити зор болуватиду. Әмма, һөкүмәт даирилири униңға йол қоймайду. Кадирларниң вә оқуғучиларниң намаз оқуши вә роза тутушини мәни қилған. Хәлқимиз шундақ қийинчилиқ ичидә өз әқидисини сақлап кәлмәктә вә мундин кейинму чоқум сақлашқа тиришиду. Силәрдин сорайдиғинимиз шуки, бу улуғ рамзан кечилиридики дуа иҗабәт болидиған саәтләрдә хәлқимиз үчүн дуа қилишиңларни сораймиз.”

Паалийәткә иштирак қилғанлар абдулһәким мәхсумниң нутқини көңүл қоюп аңлиди. Нутуқ ахирлашқандин кейин, җамаәт һәммә бирликтә “аллаһу әкбәр” дейишти. Бу уларниң нутуқтин тәсирлинип, уйғурларниң әһвалиға ечиниватқанлиқиниң бир ипадиси иди. Шуниңдин кейин, олтурғанлардин һәр бири абдулһәким мәхсум һаҗимни оттуриға еливелип, униңдин уйғурлар вә уйғурларниң ана вәтини һәққидә көп мәлуматларни алди. Андин уйғурлар үчүн һесдашлиқ қилидиғанлиқини вә қолидин кәлгәнчә диний қериндашлиқ бурчини ада қилишқа тиришидиғанлиқини билдүрүшти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт