Алимҗан инайәт: шәрқий түркистанда һакимийәткә қарши күрәш қиливатқанлар әркинлик җәңчисидур

 Хитай һөкүмити пүтүн уйғурларни дуня җамаәтчиликигә террорчи дәп көрситишкә тиришиватқан күнләрдә, уйғур зиялийлири хитайниң уйғурларға елип бериватқан сияситиниң дөләт террори икәнликини, хитай аманлиқ сақлаш хадимлириға һуҗум қиливатқан кишиләрниң әркинлик җәңчилири икәнликини булар елип бериватқан күрәшниң әркинлик вә мустәқиллиқ һәрикити икәнликини илгири сүрүшмәктә.

Бу көз қарашларни илгири сүрүватқан илим адәмлиридин бири болса, узун йил бейҗиңда бир дөләт оргинида ишлигәндин кейин, түркийигә келип, һазир измир әгә университетида оқутқучи болуп ишләватқан һазирғичә 5 китаби нәшир қилинған проф. Др. Алимҗан инайәт әпәнди.

Проф. Др. Алимҗан инайәт әпәнди түнүгүнки программимизда зияритимизни қобул қилип, өз көз қарашлирини баян қилип өткән иди. Бүгүн униң билән елип барған зияритимизниң давамини беримиз.

Профессор доктор . Алимҗан инайәт әпәнди, хитайлар немә қилиши керәк? дегән соалимизға җаваб берип мундақ деди: хитай коммунистлири шәрқий түркистан билән тибәткә мустәқиллиқини дәрһал қайтуруп бериши, башқа аз санлиқ милләтләргиму өз тәқдирини өзи бәлгиләш һәққини бериши керәк. Әгәр хитай коммунистлири хитайниң парчилинип кетишини халимиса, хәлқаралиқ қанунлар бойичә, һәқиқи мәнидики аптономийә, федератсийә вә конфедератсийә түзүмлирини музакирә қилиши керәк.

Хитайдики аз санлиқ милләтләр өз юртида өзигә өзи хоҗа болған һалда келәчикидин әнсиримәй әркин, һөр яшиялайдиған болуши керәк. Мениңчә, хитай коммунистлириниң орундашқа тегишлик вәзиписи мушу. Хитай коммунистлири шуни чүшиниши вә билиши керәкки, әгәр йеқинда хитай хәлқи һәқиқәтни чүшинип ойғинип кетидиған болса, хитай коммунистлири тарихниң әхләт сандуқидин орун елиши мумкин.