Alimjan inayet: sherqiy türkistanda hakimiyetke qarshi küresh qiliwatqanlar erkinlik jengchisidur

 Xitay hökümiti pütün Uyghurlarni dunya jama'etchilikige térrorchi dep körsitishke tirishiwatqan künlerde, Uyghur ziyaliyliri xitayning Uyghurlargha élip bériwatqan siyasitining dölet térrori ikenlikini, xitay amanliq saqlash xadimlirigha hujum qiliwatqan kishilerning erkinlik jengchiliri ikenlikini bular élip bériwatqan küreshning erkinlik we musteqilliq herikiti ikenlikini ilgiri sürüshmekte.

Bu köz qarashlarni ilgiri sürüwatqan ilim ademliridin biri bolsa, uzun yil béyjingda bir dölet orginida ishligendin kéyin, türkiyige kélip, hazir izmir ege uniwérsitétida oqutquchi bolup ishlewatqan hazirghiche 5 kitabi neshir qilin'ghan prof. Dr. Alimjan inayet ependi.

Prof. Dr. Alimjan inayet ependi tünügünki programmimizda ziyaritimizni qobul qilip, öz köz qarashlirini bayan qilip ötken idi. Bügün uning bilen élip barghan ziyaritimizning dawamini bérimiz.

Proféssor doktor . Alimjan inayet ependi, xitaylar néme qilishi kérek? dégen so'alimizgha jawab bérip mundaq dédi: xitay kommunistliri sherqiy türkistan bilen tibetke musteqilliqini derhal qayturup bérishi, bashqa az sanliq milletlergimu öz teqdirini özi belgilesh heqqini bérishi kérek. Eger xitay kommunistliri xitayning parchilinip kétishini xalimisa, xelq'araliq qanunlar boyiche, heqiqi menidiki aptonomiye, fédératsiye we konfédératsiye tüzümlirini muzakire qilishi kérek.

Xitaydiki az sanliq milletler öz yurtida özige özi xoja bolghan halda kélechikidin ensirimey erkin, hör yashiyalaydighan bolushi kérek. Méningche, xitay kommunistlirining orundashqa tégishlik wezipisi mushu. Xitay kommunistliri shuni chüshinishi we bilishi kérekki, eger yéqinda xitay xelqi heqiqetni chüshinip oyghinip kétidighan bolsa, xitay kommunistliri tarixning exlet sanduqidin orun élishi mumkin.