Shwétsiye Uyghur ma'arip uyushmisi shwétsiye parlaméntida iptarliq berdi

Iptar dastixinigha shwétsiye parlamént ezaliri, siyasiy erbablar, insan heqliri teshkilatlirining wekilliri, diniy zatlar we edib, proféssorlar bolup, 100 din artuq kishi daxil boldi.

Iptar pa'aliyitige parlamént ezasi, shwétsiye parlaménti Uyghur dostluq guruppisining rehberlirining biri bolghan memet qaplan ependi riyasetchilik qilghan bolup, u bashlash sözide Uyghurlarni qisqiche chüshendürgendin kéyin, xitaygha qayturulush xewpige duch kelgen Uyghur panahliq tiligüchilerning ehwalini parlaméntqa sunup we köchmenler idarisi bilen köp qétim söhbetlishish arqiliq ularni xitaygha qayturulush xewpidin saqlap qalghanliqini bayan qildi.

RFA/Yalqun

Iptar pa'aliyitige yene shwétsiye parlaméntidiki 3-chong partiye hésablan'ghan yéshillar partiyisining re'isi gostaw fridolinmu ishtirak qilghan bolup, u sözide Uyghurlar bilen uchrashqanliqidin we Uyghurlar heqqide uchurlargha ige bolghanliqidin xushal ikenlikini bildürgendin sirt, yéshillar partiyisi insan heqlirige ehmiyet béridighan bir partiye bolush süpiti bilen xitayning bésimgha duch kéliwatqan sherqi türkistanning ehwalinimu pelestin mesilisi qatarida diqqitige alidighanliqini bildürdi.

Tamaq ariliqida ziyaritimizni qobul qilghan anwar shannan xanim musulmanlar üchün erkinlik we barawerlik jem'iyitige wakaliten söz qilip, bügün bu yerde Uyghurlar bilen tunji qétim uchrashqanliqidin nahayiti xushal ikenlikini, özlirining musulmanlarning insan heqliri üchün küresh qiliwatqan bir teshkilat bolush süpiti bilen Uyghurlarningmu insan heqliri ehwaligha yéqindin diqqet qilidighanliqini we Uyghurlar bilen hemkarliship ishleshni xalaydighanliqini bildürdi.

Shwétsiye Uyghur ma'arip uyushmisining bu qétimqi shwétsiye parlaméntida iptarliq pa'aliyet élip bérishi 2-qétimliqi bolup, jem'iyet re'isi nijat turghun ependi ziyaritimizni qobul qilip, parlaméntta iptar pa'aliyiti ötküzüshning ehmiyiti heqqide toxtaldi.