Xelqi alemning süküt qilishi we kazafiyning wehshiliki

Liwiyide chiqqan tinchliq namayishi qoralliq urushqa aylan'ghinigha bir qanche hepte bolup qaldi. Namayishchilar deslepte arqa-arqidin ghelibige érishken we liwiyining köp jaylirini kazafiy hakimiyitidin qutquzup özlirining “Milliy komitét” ini qurghan idi. Kéyinche ehwal birdinla özgirip kazafiy qoshunliri namayishchilar igiligen rayonlardin bir qanchisini qayturup élishqa bashlap, bügün ejdabiye dégen rayonni qayturup aldi we hazirghiche kazafiyning bashqurushida bolup kéliwatqan liwiye dölet téléwiziyiside kazafiyning ghelibisi qutlandi.

Tehlilchiler misirda mubarekning tömür qorghinini 18 kün ichide örüp tashlighan bu namayish dolqunining liwiyige kelgende bunchilik sozulup kétiwatqanliqidin heyranliq hés qilishmaqta we chong döletlerning, héch bolmighanda ereb döletlirining liwiyide kazafiyning oqigha tutuluwatqan charisiz xelqni qutquzush üchün héch ish qilmaywatqanliqidin échiniwatqanliqini sözleshmekte.

Liwiye xelqi nale qilmaqta

Liwiyining sabiq bash ministiri ibni hélim qatarning “El jezire” téléwiziye qaniligha dubey shehiridiki qarargahidin 2011-yili 15-mart küni bergen bayanatida, amérika, en'gliye qatarliq chong döletlerni liwiye ishigha tizdin arilishishqa chaqirdi. U mundaq dédi: “Men herqandaq bir döletke malamet qilmaymen, peqet ularni liwiyidiki charisiz xelqni kazafiyning wehshiylerche qirip yoq qilishidin qutquzushini soraymen. Men rastinila heyran qéliwatimen. Künde onlarche, hetta yüzlerche xelq kazafiyning oqi bilen ölüp kétiwatidu, namayishchilarning kazafiygha teng kéleligüdek qoral küchi yoq. Buni hemme yaxshi bilidu. Dunyagha höküm qilalaydighan chong döletlerning liwiye ishigha arilishish mesiliside ikkilinip turuwatqanliqigha heyran boluwatimen. Men xelq'aradiki chong döletlerdin, xususen re'is obamadin ötünimenki, liwiye xelqini kazafiyning öltürüp yoq qilishidin qutquzunglar. Eger shundaq qilsanglar eng toghra qararni alghan bolisiler. Silermu bu ishta hergiz ziyan tartmaysiler. Siler chong tallash aldida turuwatisiler. Liwiye xelqini qutquzush eng yaxshi tallishinglar bolidu.”

Londonda chiqidighan “Ottura sherq” gézitining tünügünki xewirige asaslan'ghanda, xelq'aradiki chong döletler liwiye ishigha arilishish yaki arilashmasliq mesiliside herxil köz qarashta iken. En'gliye tizdin herbiy yürüsh qilip liwiye xelqini kazafiyning qetli'amidin qutquzushning zörürlükini sözlise, gérmaniyige oxshash bezi döletler liwiye ishigha arilashmasliq, herbiy yürüsh qilmasliq terepdari iken. Emma ereb döletlirining hemmisi chet döletlerning liwiyining ichki ishigha arilishishini yaqturmaydiken. Erebler özlirining bu mewqesini hazirghiche sözlep kelmekte. Liwiye mesiliside xelq'aradiki nopuzluq döletlerning köz qarashliri bir yerge kelmigenliki kazafiy üchün xizmet qilmaqta. Chünki kazafiy xelqi alemning süküt qiliwatqanliqidin paydilinip qetli'amini dawam qildurmaqta we namayishchilar igilep bolghan rayonlarnimu qayturup almaqta.