Süriyide “Hakimiyetke xatime bérish jümesi” namayishi

Bügün 2011-yili 24-iyun jüme küni jüme namizidin kéyin, süriyining her qaysi sheherliride omumyüzlük chong namayish kötürüldi.
Ixtiyariy muxbirimiz ömerjan
2011.06.24
suriye-namayish-305.jpg Süriyide hökümetke qarshi namayish dawamlashmaqta. 2011-Yili 3-may.
AFP

Her qaysi sheherlerdiki namayishchilar birdek ittipaqliship, bügünki namayishni hel qilghuch namayish dep qarar qilghan we bu künni “Esed hakimiyitige xatime bérish jümesi” dep atighan.

Tehlilchilerge köre, süriye hakimiyiti namayishchi xelqni basturush ishida yéngilgendin kéyin, xudini yoqatqan bolup, öltürüsh we tutqun qilishtin bashqa yolni talliyalmighan. Yene bir tereptin süriye armiyisining oqqa tütishidin qéchip türkiyige ötüp ketmekchi bolghan süriyiliklerni süriye armiyisi arqidin qoghlap yoqatmaqchi bolghan, hetta süriye armiyisi türkiye chégrasigha 15 kilométir qalghan jaylarghiche ilgirilep bérip, süriyidin türkiyige ötüp panahlanmaqchi bolghanlarni qoghlighan. Bu weziyet türkiye terepni ghezeplendürgen.

Amérika dölet ishliri ministiri hilari klinton süriye armiyisining türkiye chégrasigha qarap ilgirilishini ikki dölet otturisida chégra urushigha seweb bölishi mumkin dep agahlandurghan.

Xewerlerge köre, yawropa ittipaqi süriye mesilisi toghruluq mexsus yighin chaqirghan. Bir tereptin süriye hökümiti türkiyide panahlan'ghan süriyiliklerni qayturup kélish üchün ulargha wekiller guruppisi ewetken bolsimu, süriyilikler hökümetning wedilirige ishenmeydighanliqini bildürüp, süriyige qaytishni ret qilghan we ular türkiyining “Yayla téghi” dégen yéride, süriye hakimiyitining chüshüp kétishini telep qilip namayish qilghan.

Misir téléwiziyisi süriyidiki 2011-yili 24-iyun jüme künidiki namayishlarni neq meydan körsetken. Süriyilik namayishchilar namayishlirida “Esed hakimiyiti texttin chüshsun! biz uni xalimaymiz” dégen jümlini tekrarlighan. Misir téléwiziyisining xewirige asaslan'ghanda, süriyide namayish bashlan'ghinigha 100 kündin ashqan. Süriyilikler deslep namayishqa chiqqinida peqet süriyide islahat élip bérish, chériklikke qarshi turush telipi bilen namayish qilghan bolsimu, süriye hakimiyiti hazirghiche héchqandaq bir islahat élip barmighan, süriyidiki chériklik shu boyiche dawam qilghan, süriye re'isi beshshar el esedning namayishchilargha bergen chirayliq wediliridin birimu emelge ashmighan. Uni az dep süriye hakimiyiti namayishchilarni oqqa tutush we tutqun qilishni toxtatmighan, hetta jénini qutquzush üchün türkiyige panahlanmaqchi bolghanlarnimu aramida qoymastin, ularning arqisidin qoghlap barghan. Bu weziyette süriye xelqi 2011-yili 24-iyun jüme künini “Esed hakimiyitige xatime bérish jümesi” dep atap omumyüzlük namayishqa chiqqan. Namayish jeryanida yene süriye saqchiliri we armiyisi namayishchilargha oq chiqirishni dawam qildurghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.