Süriyidin qachqanlarning weziyiti

Bu sewebtin süriye xelqi jénini qoghdash ümidi bilen terep-tereplerge qéchip qutulush koyigha kirgen.

Xewerlerge asaslan'ghanda, süriyige qoshna döletler ichide türkiyining süriye xelqige bolghan hésdashliqi alahide chong bolghan. Türkiye qizil ay jem'iyiti süriyidin qéchip panahlinish üchün türkiye chégrasigha kirgenlerni qizghin qarshi alghan. Türkiye hökümiti panahlan'ghuchilarni chédir, yémek-ichmek, dora-dermekler bilen teminlep kelgen. Hazirghiche süriyidin türkiyige panahlinish üchün kirgenlerning sani 11 minggha yetken, yene süriye bilen türkiye chégrasi éghizida türkiyige kirish üchün kütüwatqanlar sani 10mingdin ashidiken.

Süriye armiyisi süriyidin türkiyige ötüsh üchün qachqanlarni izlap yürüp bombardimanlirini dawam qildurmaqta iken. Hazirghiche süriyining türkiye chégrasigha yéqin yéziliridin bir qanchisi pütünley bombardiman qilin'ghan bolup, yézining ademliri özlirining janlirini aran élip qéchishqa mejbur bolghan. Yene bir tereptin süriye hökümiti resmiy teshwiqat wasitiliride süriyidin qéchip ketkenlerni qaytip kélishke chaqirip turidiken. Lékin süriyidiki wehshiyliklerdin qéchip ketkenlerdin qaytqini yoq. Türkiye hökümiti türkiye chégrasigha kirip bolghan süriyiliklerni choqum qoghdaydighanliqini bildürgen.

Süriyidin qéchip chiqqanlar qaytishni xalimaydu

Qatarning “El jezire” téléwiziye qanilining muxbiri ömer xeshrem 21-iyun seyshenbe küni türkiyining antakiye shehiridin bergen bayanatida mundaq dédi: “Bügün türkiyining antakiye shehiridiki mexsus chédirlarda panahliniwatqan süriyilikler bilen söhbetleshkinimizde, ularning chirayidin we sözliridin ümidsizlik ipadilirini hés qilduq. Ularning süriye weziyiti ongshalmaydiken, süriyige qaytish niyiti yoqtek qilidu. Ular süriye hökümiti ulargha chirayliq wedilerni qilip qaytip kélishke chaqirghan bilen intiqam almay qoymaydighanliqini, mundin ilgirimu hökümetning wede qilghanlirining biriningmu emelge ashmay kelgenlikini bayan qilishti. Ular yene süriye re'isi beshshar el esed hakimiyiti dawam qilipla turidiken, özlirige yaxshiliq yoqluqini bildürüshti.”

“Dunya musulman ölimalar hey'iti”süriye xelqige yardem qilishni chaqiriq qildi

Qatarning “El jezire” téléwiziye qanilining xewirige köre, “Dunya islam ölimalar hey'iti” süriye weziyiti heqqide mexsus bayanat élan qilip, pütün musulmanlarni we islam ellirini süriye xelqige jiddiy yardem qilishqa chaqirghan. Bayanatta mundaq déyilgen:“Hazirqi weziyette süriye xelqige yardem qilish tolimu zörür bolup qaldi. Shunga barche islam ellirini we musulmanlarni süriye xelqige maddiy we meniwi yardem qilishqa chaqirimiz. Süriye xelqining yolluq namayishini qollaymiz we süriyidiki qérindashlirimizning yolini dawam qilishini soraymiz.”

Yene bir tereptin, xelq'ara qizil krést jem'iyiti özlirining süriyidiki yaridarlarni dawalash üchün weqe yüz bergen rayonlargha kirishige süriye hökümitining axiri ruxset qilghanliqini, bu ruxsetning köp kéchikken bolsimu yoqtin yaxshi bolghanliqini bildürüshken.