Se'udi erebistandiki Uyghurlarning péshqedemliridin tash hajim alemdin ötti

Merhumning namizi shu küni namaz esirdin kéyin nechche minglighan jama'etning ishtiraki bilen meschiti heremde oqulup, mekke mukerremde shehiridiki "mu'ella" qebristanliqigha depne qilindi.
 
Merhumning depne qilish murasimi merhumning perzentliri, yéqinliri, uruq - tughqanliri we se'udi erebistanining her qaysi rayon we sheherliridiki Uyghur jama'etchilikining toluq ishtirak qilishi bilen nahayiti chong kölemlik ötküzüldi.

Tash hajim ülgilik shexs idi

Merhum tash hajim balilirining hemmisini her qaysi penlerde oqutup, qatargha qoshushta se'udi erebistandiki Uyghurlargha ülge yaratqan shexs idi. Se'udi erebistandila emes, belki pütün ereb we islam dunyasigha nami pur ketken meshhur axbaratchi we islam mutepekkuri merhum doktor abduqadir tash bu kishining a'iliside yétiship chiqqan. Tash hajimning bashqa perzentlirining her biri birerdin ilim saheside yétishken doktorlar bolup, tash hajim özi qara ishlarda ishlep japa tartsimu balilirining hemmisini oqutup, jem'iyetke we xelqqe paydiliq ezimetlerdin qilip chiqishta ghelibe qazan'ghan shexs idi.

Merhum tash hajim Uyghur élining xoten wilayitidin bolup, bundin atmish yillar ilgiri a'ilisi bilen se'udi erebistanigha hijret qilip chiqqan we hayatining köp qismini ta'if shehiride ötküzgen. Chünki ta'if rayoni égizlikte bolghanliqtin se'udi erebistanining salqin rayonliridin sanilidu. Ötmüshlerde öylerde hazirqidek hawa tengshigüchler bolmighanliqtin, mekke we medine sheherliride issiqtin turush nahayiti qiyin bolup, shu sewebtin Uyghurlarning köp sanliqi ta'if shehiride yashighan iken. Tash hajim ömrining axirqi yillirini jidde shehiride ötküzgen.

Se'udi erebistanigha kélip yerliship qalghan Uyghurlarning köp sanliqi 1949 - yilidin kéyin yurttin panah izdep kelgen Uyghurlardin ibaret bolup, ularning köpinchisi özining ismini yézishni bilmeydighan kishiler bolghanliqtin, hayatning qiyin musapiliride, nurghunlighan achchiq sawaqlarni bashliridin kechürüsh netijiside, oqush we öginishning neqeder zörür ikenlikini we bilimsizlikning élip kélidighan bexitsizliklirini hés qilghan bolushi éhtimal. Shunga se'udi erebistanigha kelgenlerdin köpinchisi bilimsiz qalghan bolsimu perzentlirini hayatliqning shertliri qanchilik qiyin bolushigha qarimay oqutush we bilimlik ademlerdin qilishqa intayin zor ehmiyet bergen. Shunga bu Uyghurlarning eng yaxshi qilghan ishlirining béshida, özliri japa tartsimu balilirini pulgha chidap dunyaning herqaysi jayliridiki meshhur aliy mekteplerde oqutup yétishtürgenliki kélidu. Bu heqiqeten teqdirleshke tégishlik yaxshi ish idi. Shundaq yétiship chiqip öz millitining sheripini kötürgen Uyghurlarmu az emes.

Yuqiridiki awaz ulinishidin, bu heqtiki melumatimizning tepsilatini anglaysiler.