Amérikida teshekkür bayrimi tebriklendi

Sürette, prézidént obama körki toxo "gheyret" ni enene boyiche kechürüm qilmaqta.

Bu yilliq teshekkür bayrimi amérikining yer shari xaraktirlik pul - mu'amile krizisige uchrap, amérikida ishsizliq nispiti éshiwatqan bir mezgilge toghra kelgen bolsimu, lékin turmushini xushal - xoram, azade, xatirjem ötküzüshke adetlen'gen amérikiliqlar bu yilliq teshekkür bayrimini yillardikige oxshashla xushal keypiyatta, uruq - tughqanlar jem bolushup, yaxshi tilekler bilen ötküzüshken.

Amérikida teshekkür bayrimi künide, kishiler uruq - tughqanliri bilen körüshüp bir a'ile kishiliri jem bolup, birlikte körki toxu we miwe tortliri yiyish arqiliq kélerki yilning hemmeylen'ge bayashatliq we xatirjemlik élip kélishini tileydighan bolup, amérikida ishsizliq nispiti éshiwatqan mushundaq bir mezgilde amérikiliqlar bu bayramgha téximu ehmiyet bergen.

Amérika metbu'atlirining bügünki xewiridin melum bolushiche, amérikiliqlar bu yilliq teshekkür bayrimi pilanini yillardikidin mol we mezmunluq orunlashturghan. Melum bolushiche, bu yil teshekkür bayrimida texminen 38 milyon amérikiliq uruq - tughqanliri bilen jem bolup bayramni birlikte ötküzüsh üchün, sayahet pilani orunlashturghan.

Her yili noyabirning axirqi heptisi charshenbe küni, teshekkür bayrimidin bir kün ilgiri aqsarayda ötküzülidighan teshekkür bayrimi ziyapitididin ilgiri, amérika prézidénti obama a'ilisi bilen birlikte washin'giton shehiridiki namratlargha teshekkür bayrimiliq yimeklik tarqatqan.

Obama yene yillardiki prézidéntlar dawamlashturup kéliwatqan en'ene boyiche,, kechlik ziyapette yiyish üchün teyyarlan'ghan bir dane körki toxoni öltürgüzmey shertsiz halda qoyuwetken we bu körki toxogha "gheyret" dep nam bergen. Bu toxu bulturqi teshekkür bayrimida ziyapet üstilige yémeklik bolushtin azad qilin'ghan "karaloyna" isimlik yene bir körki toxo bilen birlikte, ayrupilan arqiliq désniy baghchisigha apirilidiken.

Amérikida teshekkür bayrimi, kolumbuning bu zéminni tapqinidin we yawropa köchmenliri bu zémin'gha köchmen bolup kelginidin kéyin xatirilinishke bashlighan. Bu bayram deslep amérikigha köchmen bolup kelgen en'giliyilik köchmenliri arisida ötküzületti. Ular ilgiri en'giliye déhqanliri kech küz mezgilide ötküzülüp kéliwatqan mol - hosul bayrimi asasida, amérika quruqluqigha kelgendin kéyinki hosulini tebriklesh hem yerlik indi'anlarning eng deslep amérigha kelgen kolumbu we uning dostlirini, körki toxo bilen méhman qilghanliqini xatirilesh, bu zéminning esli igiliri bolghan yerlik xelq indi'anlargha rehmet éytish meqsitide bu bayramni ötküzüshken. Kéyinki künlerde bu bayram bu zémin'gha kelgen barliq köchmenler arisida omumliship bügünki künde dölet xaraktérlik bir bayramgha aylan'ghan.

Bügünki künde amérikigha olturaqliship qalghan Uyghurlar arisidimu bu bayram künide körki toxo yiyish aditi shekillinishke bashlighan bolup, amérikidiki Uyghurlardin ziyaritimizni qobul qilghan turdi ependi özining bu bayram künidiki tesiratlirini bayan qilip ötti.

Turdi ependi, amérikida teshekkür bayrimi tebrikliniwatqan bu künning dunya musulmanlirining qurban héyt bayrimi ikenlikini, Uyghurlar dunya musulmanliri bilen birlikte qurban héytni tebriklewatqan mushundaq bir bayram künide, xitay hökümitining télifon we intérnétni téxiche eslige keltürmey, Uyghurlarni insanning eng eqelli bolghan uruq ‏ - tughqanliri bilen télifonda ehwal sorash pursitidinmu mehrum qilghanliqini eyiblidi.

Ziyaritimizni qobul qilghan nurmemet ependimu amérikidiki teshekkür bayrimi bilen xtay hökümitining Uyghurlarning qurban héyt bayrimigha tutqan oxshimighan pozitsiyisini sélishturup, xitay hökümitini eyiblidi.

Hörmetlik oqurmenler, nöwette xitay hökümitining Uyghur élidiki muqimliqini bahane qilip, intérnét we téléfon alaqisini téxiche eslige keltürmesliki, hetta bayram künliridimu chet'ellerdiki Uyghurlarni wetendiki uruq - tughqanliri bilen téléfonda körüshüsh pursitidin mehrum qilishi xelq'ara kishilik hoquq jem'iyetliri hem gherb démokratik döletlirining eyiblishige uchrimaqta.