Torontoda yene hüseyin jélilgha erkinlik telep qilish, namayishi ötküzüldi

Béyjing olimpik musabiqisi yekshenbe küni axirlashti. Kanadaning toronto shehride, xitay da'irlirining Uyghurlarning kishilik hoquqlirini éghir halda depsende qiliwatqanliqi we kanada puqrasi hüseyin jélilni yenila turmida tutup turiwatqanliqigha naraziliq bildürüsh namayish élip bérildi.
Muxbirimiz kamil tursun xewiri
2008.08.26
kanada-huseyin-jelil1-305 Kanada hökümitini hüseyin jélil mesiliside xitaygha qarita bésimni qaytidin kücheytishke ündesh kocha aylinip naraziliq bildürüsh namayishidin körünüsh.
RFA Photo / Kamil Tursun

 Namayish torontodiki xitaylar merkezlik olturaqlashqan rayonda bashlinip,xitay konsulxanisining aldida dawam qildi.Hüseyin jélilni qoyuwétishni telep qilidighan we xitayni eyibleydighan herxil lozunkilarni kötürgen namayishchilar xitay konsulxanisidin hüseyin jélilni qoyuwétishni telep qildi.

Namayishqa Uyghurlar we kanadadiki kishilik hoquq teshkilatliri we musulman teshkilatlirining wekilliridin bolup, 60 etrapida kishi qatnashti.

Kanada Uyghur jemiyitining bash katibi tuyghun abduweli ependi yekshenbe küni, torontodiki xitay bash konsulxanisi aldida ötküzülgen namayishning xitay we kanada hökümetlirige hüseyin jélil mesiliside bésim ishlitish ikenligini tekitlidi.

Namayishta xelqara kechürüm teshkilati we namratliqtin qutulush jem'iyiti qatarliq teshkilatlarning wekilliri söz qilghan bolup, "namratliqtin qutulush teshkilati" ning mes'uli matthéw ependi sözide,kanada hökümitining hüseyin jélil mesiliside jiddi heriketke ötüshi zörürlikini tekitlep: "hüseyin jélilning 2 yildin béri, xitay turmisida turushining özi kanada hökümiti üchün nomus qilarliq ish.Kanada hökümiti hüseyin jélil heqqidiki pa'aliyetlirini téximu kücheytishi we derru hüseyin jélil heqqide mexsus bir ömekni teshkillep xitaygha ewetishi, zörür bolghan pa'aliyetler arqiliq, uni ayali we 4 perzenti bilen jem qilishi kérek. Bu kanada hökümitining bash tartip bolmaydighan burchi," dédi. U sözide, hüseyin jélil tewe bolghan Uyghurlarning nöwette xitay da'irliri teripidin hoquqliri éghir halda depsende qiliniwatqanliqini eskertip ötti.

Bügünki namayishqa hüseyin jélilning kamile xanim qatnashqan bolup, u hüseyin jélil mesilisi heqqide qisqiche melumat berdi.

Biz namayishqa qatnashqan Uyghurlarni ziyaret qilghinimizda, ular namayish heqqidiki tesiratini we nöwette Uyghurlarning eng éghir azaplarni tartiwatqanliqini bayan qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.