Torontodiki Uyghurlar tibet erkinlik mesh'ili pa'aliyitide tibetlikler bilen birge

Mart éyida, grétsiyining aténa we olimpiye sheherliridin bashlan'ghan,simwolluq tüstiki bu mesh'el yawropadiki birqanche muhim sheherni aylinip, aldinqi heptide kanada yétip kelgen we wankuwér, ottawa we montré'al qatarliq sheherlerde aylandurulghan idi.

5000 Etrapida tibetlik köchmen yashaydighan toronto shehiri bu mesh'elning kanadadiki axirqi békitidur. Bu munasiwet bilen kanada tibet komitéti toronto shehiride tibet erkinlik mesh'ilini qarshi élish we xitay hökümitige qarshi naraziliq pa'aliyetliri ötküzdi. Torontodiki xitay konsulxanisining aldida ötküzülgen naraziliq we sükütte turush pa'aliyitige tibetliklerni qollash yüzisidin Uyghurlarmu qatnashti.

Tibet erkinlik mesh'ili dunyadiki 50 nechche muhim sheherni aylinip,axiri béyjing olimpik musabiqisining harpisida tibetke yetküzilidu. Béyjing da'iriliri olimpik mesh'ilini Uyghur rayoni bilen tibette aylandurush arqiliq,dunyagha Uyghur we tibetliklerning xitay hökümranliqida bextiyar yashawatqanliqini körsitishke urunmaqta.

Torontodiki namayish xitaydiki yer tewreshte we bérmadiki su apitide ölgenlerning rohigha sükütte turush bilen bashlan'ghan. Kanada Uyghur jem'iyitining re'isi ruqiye turdush xanim we siyasiy pa'aliyetchi tuyghun abdiweliler bügünki bu namayishqa qatnishishning sewebliri we Uyghurlarning pa'aliyetliri heqqide toxtaldi.