Türkiyining mezlumlar jem'iyiti xitay konsulxanisining aldida namayish qildi

21 ‏- Aprél, düshenbe küni, turkiye "mezlumlar jem'iyiti" we "sherqiy türkistan ma'arip we hemkarliq jem'iyiti" birlikte uyushturghan namyshtin körünüsh.

 Ötken hepte sa'adet partiysi bilen sherqiy türkistan ma'arip we hemkarliq jem'iyiti birlikte xitay konsulxanisining aldida namayish qilip xitay hakimiyitining Uyghurlargha qarita élip bériwatqan basturush heriketlirini toxtitishni we xotende tutqun qilin'ghan ayallarni shertsiz derhal qoyup bérishni telep qilghan idi.

Bu hepte yene 21 ‏- aprél düshenbe küni insan heqlirini qoghdash we zulumgha uchrighan xelqlerge yardem qilish üchün xizmet qilidighan "mezlumlar jem'iyiti" we "sherqiy türkistan ma'arip we hemkarliq jem'iyiti" ning birlikte uyushturushi bilen 50 kishidin terkip tapqan bir guruppa, qollirida ay yultuzluq kök bayraq bilen türkiyining bayriqini kötürüp "mezlumlarning awazigha qulaq salmighanlargha ah urimen" , "zulumgha qarshiliq körset , bolmisa uninggha könüp qalisen"dégen chong xetler yézilghan wiwiskilarni kötürgen halda xitay konsulining aldigha toplinip namayish qildi.

 Namayishchilar xitay hakimiyitining Uyghurlargha qarita élip bériwatqan basturush heriketlirini toxtitish we xotende tutqun qilin'ghan ayallarni shertsiz halda derhal qoyup bérishni telep qildi . Xitayning istanbuldiki konsulxanisi aldigha toplan'ghan namayishchilargha wakaliten mezlumlar jem'iyitining istanbul shöbe bashliqi ayxan küchük söz qilip 2008 ‏- yili 23 ‏- mart küni xotende élip bérilghan namayishta tutqun qilinip türmige qamalghan 600 neper xanim ‏- qizlarning qoyup bérilishi üchün b d t insan heqliri teshkilati , yawrupa ittipaqi we amérika qatarliq pütkül döletler we xelq'araliq ammiwiy teshkilatlarning xitaygha bésim ishlitishni telep qildi. Hemde söz qilip, xitayning sherqiy türkistan xelqini wehshiyane basturush heriketlirini toxtitish we xotende qolgha élin'ghan 600 neper xanim ‏- qizlarning türmidin qoyup bérilishi üchün xitay hakimiyitige bésim ishlitishte xelq'araliq ammiwi teshkilatlarning qollap ‏- quwwetlishini telep qildi.

Namayishqa köp sanda radi'o ‏- téléwiziye muxbirliri we axbaratchilarmu kelgen idi. Axbaratchilar xitay konsulxana binasining dérizisidin mexpiy sheklide resimge tartiwatqan we sin'alghugha éliwatqan 2 neper xitay qizni körgendin kéyin ularmu resim we sin'alghu apparatlirini xitay konsulxana binasining ichidiki u ikki neper xitay qizgha toghrilidi. Namayishning bixeterlikini közde tutup köp sanda saqchilarmu kelgen idi.

Biz namayishqa qatnashqan pishqedem wetenperwer zat memet seley hajim artushi bilen söhbet élip barduq.