13 - Nöwetlik türk dunyasi ressamlar uchrishishi istanbulda dawamlashmaqta

Sabiq sowét ittipaqi parchilan'ghandin kéyin türkiye türkiy jumhuriyetliri we türkiy milletler bilen bolghan munasiwitini tereqqiy qildurush üchün her xil pa'aliyetlerni uyushturmaqta. Bulardin biri türksoy ressamlar uchrishishidur.
Muxbirimiz erkin tarim
2010-06-23
Élxet
Pikir
Share
Print
Sürette, istanbulda dawamlishiwatqan 13 - nöwetlik türk dunyasi ressamlar uchrishishigha uyghur ressamlargha wakaliten qatnishiwatqan, hazir gérmaniyining myunxén shehride olturushluq, tonulghan uyghur ressam merwayit hapiz xanim.
Sürette, istanbulda dawamlishiwatqan 13 - nöwetlik türk dunyasi ressamlar uchrishishigha uyghur ressamlargha wakaliten qatnishiwatqan, hazir gérmaniyining myunxén shehride olturushluq, tonulghan uyghur ressam merwayit hapiz xanim.
RFA Photo / Erkin Tarim

Bu pa'aliyetning birinchi qétimliqi 1997 - yili ötküzülgen bolup, 13 - qétimliqi bu yil istanbulning asiya teripidiki marmara konggiré merkizide ötküzülmekte. Bu nöwetlik pa'aliyet 6 - ayning 15 - künidin 30 - künigiche ötküzülidighan bolup, 18 türkiy millettin 19 tonulghan ressam qatnashmaqta.

Uyghur ressamlargha wakaliten hazir gérmaniyining myunxén shehride olturushluq, tonulghan Uyghur ressam merwayit hapiz xanim bilen qazaqistanliq tonulghan ressam exmet exet ependi qatnashqan.

Bu pa'aliyetni uyushturghan xelq'araliq türkiy milletler medeniyet idarisi mes'ulliridin sanjar mulayim'oghlu ependi mezkur pa'aliyet heqqide melumat bérip mundaq dédi: "türksoy yeni xelq'araliq türkiy milletler medeniyet idarisi qurulghan 1997 - yilining bashlirida türk dunyasi ressamlar uchrishishi ötküzgen iduq. Bu pa'aliyetke türksoygha eza türkiy milletlerdin tonulghan ressamlar qatnashmaqta. Bügün'giche bolghan 12 qétimliq uchrishishta 800 din köp resim sizildi. Hazirghiche 150 ressamni bir yerge jem qilduq. 13 - Qétimliq ressamlar uchrishishini dangliq türk ressam osman hamdi ependining wapat bolghanliqining 100 - yilliqigha atap ötküzduq. Bu pa'aliyetke qatnishiwatqan ressamlar ikki hepte birlikte resim sizidu. Bu resimler 6 - ayning 30 - küni chüshtin kéyin sa'et 2de istanbul arxé'ologiye muzéyida körgezmige qoyulidu. Uyghur ressam exmet exet bilen merwayit hapiz xanimning resiminimu qoyimiz. Istanbuldiki Uyghurlar kélip ziyaret qilsa bolidu."

Qisqartilma nami "türksoy" dep atalghan xelq'araliq türkiy milletler medeniyet teshkilati türkiy xelqlerning medeniyitini qoghdash we tereqqiy qildurush meqsiti bilen qurulghan bolup, merkizi enqerege jaylashqan. Bu teshkilatqa musteqilliqqe érishken ottura asiya türkiy jumhuriyetliridin bashqa tatar, tuwa, xakas we chuwashqa oxshash türkiy milletlermu eza bolghan. Xitay hökümiti ruxset qilmighachqa Uyghur élidiki Uyghurlar eza bolalmighan.
 
13 - Nöwetlik türk dunyasi ressamlar uchrishishi heqqide téximu tepsili melumat élish üchün Uyghur ressam merwayit hapiz we exmet exet ependiler bilen söhbet élip barduq.

Yuqiridiki awaz ulinishidin, bu heqtiki söhbitimizning tepsilatini anglaysiler.
Toluq bet