Türkiye jumhuriyiti 2008 - yilliq ürümchi soda yermenkisige resmiy hey'et bilen qatnashmaqchi

Her yili 9 - ayning 1 - künidin bashlap ürümchide ötküzülüwatqan ürümchi soda yermenkisi yene bashlinish aldida turmaqta. Bu yermenkige her yili xitay shirketliridin bashqa yene bezi döletler dölet teripidin uyushturulghan resmiy hey'etler bilen qatnishiwatqan bolsimu, türkiye jumhuriyitidin bügün'giche öz aldigha yermenkige qatnashqan bir qanche shirket sirtida, döletning resmiy hey'iti téxi qatniship baqmighan idi.
Muxbirimiz erkin tarim xewiri
2008-07-31
Share
ministir-kurshat-tuzmen-305 Sürette, türkiye jumhuriyiti tijaret ministiri kürshad tüzmen.
RFA Photo / Erkin Tarim
 Emma bu qétim türkiye jumhuriyiti tijaret ministiri kürshad tüzmenning bashchiliqidiki resmiy hey'et bilen 2008 - yilliq ürümchi soda yermenkisige qatnashmaqchi bolghan bolup, buning üchün türkiye istanbul meden we métal import we ékisportchiliri birlikining tor békitide mezkur yermenke üchün sodiger chaqirish élani chiqirilghan.

Sodiger chaqirish élani "yipek yoligha échilishni xalamsiz?" dégen mawzuda bérilgen bolup, élanda xitay bilen bolghan tijaretni her jehettin tereqqi qildurush üchün türkiye jumhuriyitining 2006 - yilidin béri xitaygha dölet istratégiyisi yürgüziwatqanliqi, buninggha asasen xitayning oxshimighan rayonlirida tijariy pa'aliyetlerni élip bérishni pilanlighanliqi, shunga türkiye jumhuriyitining shinjang Uyghur aptonom rayoni bilen bolghan tijariy we iqtisadiy munasiwetni küchlendürüshni meqset qilip 2008 - yilliq ürümchi soda yermenkisige resmiy hey'et ewetishni qarar qilghanliqi yézilghan.

Sodiger chaqirish élanida yene shinjang Uyghur aptonom rayonining istratégiyilik ehmiyetke ige bir jughrapiyide bolushi shundaqla etrapini orap turghan döletlerde meydan'gha kelgen iqtisadiy tereqqiyatlar netijiside, bu rayonning xitay dölitining ottura asiyaning néfitige érishishidiki waste bolup "énérgiye karidori" haligha kelgenliki we rayon xelqining kishi béshigha chüshidighan milliy kirimning 2000 dollar ikenliki yézilghan.

Türkiyidin kélidighan bu hey'et sheripige Uyghur aptonom rayonluq hökümiti ziyapet béridighan bolup, türkiye tijaret ministiri kürshad tüzmenmu türkiye jumhuriyiti namidin ürümchi shériton méhmanxanisida ziyapet béridiken. Kürshad tüzmen ziyaret jeryanida ürümchidin bashqa yene, qeshqergimu baridiken.

Hemmimizge melum bolghinidek, türkiye - xitay munasiwetliri her da'im Uyghurlar mesilisi yüzidin dawalghup turatti. Xitay, türkler bilen Uyghurlar arisidiki qandashliq munasiwet tüpeyli esla türkiyige ishenmey kelgen we ularni Uyghur rayonidin uzaq tutup kelgen idi. Undaqta türkiyining resmiy hey'et halitide dölet ministiri bilen ürümchi yermenkisige qatnishishi némini ipadileydu ? bu tijariy munasiwetler heqiqeten ishqa ashamdu yaki quruq qeghez péti qalamdu?

Eger bu so'allargha jawab tépishni xalisingiz, yuqiridiki awaz ulinishidin, türkiye - xitay munasiwetliri mutexessisi, tetqiqatchi doktor erkin ekrem ependi bilen élip barghan söhbitimizge qulaq salghaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet