Türkiye 20 neper Uyghur heqqide bayanat élan qildi

Süret, sherqiy türkistan medeniyet we hemkarliq jemiyiti bashliqi séyit tümtürk ependining türkiye parlaménti insan heqliri komitéti bashliqi zafer üskül ependi bilen körüshüwatqan körünüsh.

Bayanatta yene, xitay hökümitini qayturup bérilgen Uyghurlarning aqiwiti heqqide dünya jama'etchilikke melumat bérishke, ulargha adil mu'amile qilishqa chaqirghan.

Bu bayanat élan qilin'ghan waqitta, sherqiy türkistan medeniyet we hemkarliq jem'iyiti bashliqi séyit tümtürk bashchiliqidiki 3 kishidin terkip tapqan hey'et türkiye parlaménti insan heqliri komitéti bashliqi zafer üskül ependi bilen körüshüwatqan idi.

D u q mu'awin bashliqi séyit tümtürk ependi kambodja hökümitining xelq'ara qanun'gha boysunmay 20 Uyghurni xitaygha qayturup bergenlikini, xitaydiki ölüm jazasining dawamlishiwatqanliqini, türkiyining buninggha qarap turmasliqi kéreklikini éytti.

Kéyin zafer üskül ependi söz qilip mundaq dédi: "5 ‏- iyul weqesidin kéyin, biz parlaméntlar bir hey'et teshkillep ürümchige barmaqchi iduq. Xitaylarmu qobul qilghan idi. Emma bizning tashqi ishlar ministirliqi buninggha taza qiziqmidi. Ötkende biz insan heqliri komitéti ezaliri re'is jumhurimizni ziyaret qilduq. U bizge chet döletlerde insan heqlirini tekshürgen waqtinglarda, siler qaytip kelgendin kéyin ularning béshigha kélidighanlarni oyliship ish qilinglar dédi."

Axirida, d u q mu'awin bashliqi séyit tümtürk ependi 5 - iyul ürümchi weqesi we panahliq tiligüchi Uyghurlar heqqidiki telepler bayan qilin'ghan bir doklatni türkiye insan heqliri komitéti bashliqi zafer üskülge tapshurdi.

Bügün türkiye parlaméntida Uyghurlar heqqide yene némiler boldi? bu heqte tepsiliy melumat élish üchün mikrafonimizni séyit tümtürk ependige uzattuq.
 
Yuqiridiki awaz ulinishidin, bu söhbitimizning tepsilatini anglaysiler.