Istanbuldiki Uyghurlar 2012-yilliq qurban héytni birlikte ötküzdi

Istanbulda pa'aliyet qiliwatqan sherqiy türkistan wexpi, sherqiy türkistan ma'arip we hemkarliq jem'iyiti, sherqiy türkistan yashlar jem'iyiti, sherqiy türkistan méhri-shepqet jem'iyiti qatarliq ammiwi teshkilatlarning birlikte uyushturushi bilen sherqiy türkistan wexpining hoylisida qurban héyt bayrimini tebriklesh pa'aliyiti ötküzüldi.

Bu pa'aliyetke istanbulda yashawatqan er-ayal we kichik balilar bolup 500 din artuq kishi qatnashti. Bir-biri bilen quchaqliship körüshüwatqan, bir-birining qurban bayrimini tebriklishiwatqan, bir-biri bilen söhbetlishiwatqan qizghin keypiyatqa qoshulup, awaz yangratqudin angliniwatqan jarangliq naghra-sunay awazi sorun ehlige weten ichidiki qurban bayramni esletti.

RFA/Arslan

Pa'aliyetke Uyghur ziyaliy doktor alimjan atawullah riyasetchilik qildi. Pa'aliyet aldi bilen qur'an kerim tilawet qilish bilen bashlandi. Kéyin sherqiy türkistan wexpining re'isi memet eysa artish, sherqiy türkistan ma'arip we hemkarliq jem'iyitining mes'ulliridin abdulhekimxan mexsum, hidayetullah oghuzxan, sherqiy türkistan yashlar jem'iyitining mes'uli tibet yüjetürk, sherqiy türkistan méhri-shepqet jem'iyitining mes'uli yüsüp yüsüp'oghli qatarliq mes'ullar sehnige chiqip söz qildi we sorun ehlining qurban bayrimini tebriklidi.

Kéyin Uyghur perzentliridin merdan isimlik oqughuchi abduréhim ötkürning iz namliq shé'irni jarangliq diklamatisye qildi. Uningdin bashqa yene Uyghur ösmürler her xil nomur körsetti.

Programma ikki sa'et dawam qilghandin kéyin tamaq ziyapiti bérildi.

Biz pa'aliyet axirida sherqiy türkistan wexpining re'isi memet'eysa artish bilen bu pa'aliyet toghrisida söhbet élip barduq.