Рәҗәп тайип әрдоған давоста зални ташлап чиқип кәтти

Түркийә баш министири рәҗәп тайип әрдоған шветсарийиниң давос дегән йеридә ечиливатқан дуня иқтисад йиғинидики, пәләстинниң ғәззә мәсилиси темисидики йиғинда, исраилийә дөләт рәиси пәрәскә аччиқлинип ,"сиз адәм өлтүрүшни яхши билисиз" деди.
Мухбиримиз әркин тарим
2009.01.30
Turk-Erdogan-Peres-305 Түркийә баш министири рәҗәп тайип әрдоған шветсарийиниң давоста ечиливатқан дунйа иқтисад йиғинида, исраилийә дөләт рәиси пәрәскә аччиқлинип сөзләватқан көрүнүш.
AFP Photo

Сөз қилиш вақтини шимон пәрәскә қариғанда аз бәргәчкә түркийә баш министири рәҗәп тайип әрдоған йиғин залини ташлап чиқип кәтти.

Давостики дуня иқтисад йиғинида түркийә баш министири рәҗәп тайип әрдоған билән исраилийә рәис җумһури пәрәсниң җидили дуня җамаәтчиликиниң диққәт етибарини йәнә бир қетим ғәззә мәсилисигә буриди.

Бирләшкән дөләтләр тәшкилати баш секретари бан ки мун билән әрәб бирлики баш секретари әмир мусаму сөзлигүчи сүпитидә қатнашқан оттура шәрқ мәсилиси һәққидики бу йиғинда, түркийә баш министири рәҗәп тайип әрдоған исраилийиниң ғәззәгә елип бериватқан һуҗумини тәнқид қилип, исраилийиниң хамас билән музакирә елип бериши керәкликини тәкитлиди.

Униңдин кейин сөзгә чиққан шимон пәрәс юқири аваз билән әрдоғанниң сөзлиригә җаваб бәрди вә хамасни әйиблиди. Пәрәсниң бу сөзлирини йиғин залида олтурған бәзи кишиләр чавак челип алқишлиди.

Пәрәсниң гепи түгә түгимәй рәҗәп тайип әрдоған сөз һәққи тәләп қилди, йиғин риясәтчиси сөзләшкә рухсәт қилмиди. Буниңға қаттиқ аччиқи кәлгән рәҗәп тайип әрдоған шимон пәрәскә җавабән мундақ деди: "сениң йешиң мәндин чоң, авазиң бәк юқири чиқиватиду. Сәндики бу җинайәтчи психологийиси. Сиз инсан өлтүрүшни яхши билисиз".

У бу сөзләрни дегәндин кейин пәрәсниң сөзигә чавак челип алқишлиған инсанларға қарап туруп мундақ деди: "зулум қилғанларни алқишлиғанларни ейибләймән".
 
Сөз алғанларниң һәммисиниң 12 минут сөз қилғанлиқини, исраилийә рәис җумһури шимон пәрәсниң дәл 25 минут сөз қилғанлиқини ейтқан рәҗәп тайип әрдоған "буниңдин кейин давосқа кәлмәймән" дәп, сәһнидин удул сиртқа чиқип кәтти. 2 - Айниң 29 - күни ахшам түркийидики пүтүн телевизийә қаналлири нәқ мәйдандин бәргән бу хәвәр дуняниң биринчи күн тәртипидики вәқәгә айланди.

Бу вәқә йүз берип йерим саәт өтәр өтмәй түркийидики пүтүн телевизийиләр давостин нәқ мәйдандин исраилийә рәис җумһури шимон пәрәсниң рәҗәп тайип әрдоғанға телефон қилип авазини юқири чиқирип гәп қилип салғанлиқи үчүн әпу сориғанлиқи һәққидики хәвәрни тарқатти.

Шветсарийиниң шәрқидики давоста ечиливатқан дуня иқтисад йиғинида йүз бәргән бу вәқә дуняда болупму түркийидә қаттиқ ғулғула пәйда қилди.

Түркийә баш министири рәҗәп тайип әрдоғанниң исраилийә рәис җумһури шимон пәрәскә қаттиқ гәп қилип сәһнини ташлап чиқип кәткәндин кейин бәзи кишиләр уни езилгән хәлқниң қәһримани дәп елан қилса, йәнә бәзи кишиләр баш министирниң бу қопаллиқиниң дипломатийигә мувапиқ әмәсликини илгири сүрүшмәктә.

Йәнә бәзи кишиләр әрәб дөләтлири җим турувалған бундақ бир пәйиттә түркийиниң пәләстин мәсилисигә бундақ көңүл бөлүп кетишиниң түркийиниң алий мәнпәәтигә зиян елип келидиғанлиқини илгири сүрүшсә, йәнә бәзи кишиләр түркийиниң оттура шәрқтики абройини юқири көтүридиғанлиқини илгири сүрүшмәктә.

Бу һәқтики көз қарашлирини елиш үчүн түрк мутәхәссисләргә микрафонимизни узаттуқ. юқиридики аваз улинишидин, бу һәқтики тәпсили мәлуматимизни аңлайсиләр.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.