Министир өмәр динчәр: 'түркийидә күнигә 2 долларға ишләватқан 20 миң хитай ишчи бар'

Түркийидә "хитайни чүшиниш" намлиқ паалийәт давам қиливатқан күнләрдә түрк мәтбуатлирида арқа - арқидин шәрқий түркистан мәсилиси һәққидә һөҗҗәтлик филимләр көрситилмәктә, түркийә һөкүмити рәһбәрлири хитай һәққидә баянат елан қилмақта.
Мухбиримиз әркин тарим
2010-10-21
Елхәт
Пикир
Share
Принт
Сүрәттә, түркийә ишчи вә иҗтимайи параванлиқ министири өмәр динчәр әпәнди.
Сүрәттә, түркийә ишчи вә иҗтимайи параванлиқ министири өмәр динчәр әпәнди.
RFA Photo / Erkin Tarim

10 - Айниң 19 - күни ақшам саәт 10 да түркийиниң дөләт телевизийиси болған т р т түрктә "шәрқий түркистан мәсилиси" намлиқ һөҗҗәтлик филим тарқитилди. Бу филимдә шәрқий түркистан мәсилисиниң келип чиқиш сәвәблири, бүгүнки әһвали вә келәчәки баян қилинған.

Бу һөҗҗәтлик филимдә түркийидә уйғурлар һәққидә тәтқиқат елип бериватқан тонулған мутәхәсисләрдин др. Әркин әкрәм, проф. Др. Әһәд андиҗан, проф. Др. Тимур қоҗаоғлу вә др. Абдулхамит авшар әпәндиләрниңму көз қарашлириға йәр берилгән.

Т р т телевизийиси америкиға мәхсус киши әвәтип рабийә қадир ханим биләнму сөһбәт елип берип һөҗҗәтлик филимгә киргүзгән. Хитай дөлити түрк җамаәтчиликигә хитайни тонуштуриватқан күнләрдә буниң елан қилиниши кишиләрниң диққитини қозғиди.
 
Бүгүн 10 - айниң 21 - күни түркийә ишчи вә иҗтимайи параванлиқ министири өмәр динчәр әпәнди "вәтән" гезитигә баянат берип, түркийидә күнигә 2 долларға ишләйдиған 20 миң хитай ишчи барлиқини ейтқан.

Министир өмәр динчәр әпәнди баянатида йәнә мундақ дегән: "хитай ишчиларни ишлитиватқан ширкәтләр немишқа хитай ишчиларға түркийидә қануний ишләш рухсити бәрмәйсиләр дәп хапа болуватиду. Хитай ишчилар түрк ишчилардин бәкла яхши ишләмду? түркийидә һазир қанунсиз ишләватқан 20 миң хитай ишчи бар, буниңдин хәвириңлар барму? дәп пәрят қилди. Түркийидә қурулушта, тоқумичилиқ саһәсидә ишләватқан қанунсиз хитай ишчилар оттура һесаб билән айда 65 доллардин 100 долларғиқә мааш алиду."

Түркийә ишчи вә параванлиқ министири өмәр динчәр әпәнди вәтән гезитигә бәргән баянатида, йеқиндин буян хитай ишчилириға хизмәт рухсити елиш үчүн илтимас қиливатқан хитай ишчиларни ишлитидиған ширкәтләрниң көплүкини, бу ширкәт хоҗайинлириниң өзидин, немишқа хитай ишчилириға ишләш рухсити бәрмәйсиләр дәп сораватқанлиқини баян қилип мундақ дәйду: "дөлитимиздә ишсизлиқ көпийиватқан күнимиздә,хитай ишчилар қиливатқан ишни түрк ишчиларму қилалайдиған туруғлуқ, хитай ишчиларға түркийидә ишләш үчүн рухсәт бериш дөлитимиз пуқралириға һәқсизлиқ қилғанлиқ болиду."

Министир өмәр динчәр әпәнди баянатида чәтәлликләргә түркийидә ишләш рухсити беришни асанлаштурғанлиқини, бу дегәнлик һәммә кишиләргә рухсәт берилиду дегәнлик әмәсликини ейтқан.

Түркийидә "хитайни чүшиниш" паалийити өткүзүлүватқан бүгүнки күндә дөләт телевизийисидә шәрқий түркистан мәсилисигә йәр берилишидики сәвәп немә? хитай ишчиларниң түркийидә барғансери көпийишидики сәвәп немә? дегәнгә охшаш суалларға җаваб тепиш үчүн қоч университети оқутқучиси проф. Др. Тимур қоҗаоғли билән сөһбәт елип бардуқ.

Юқиридики аваз улинишидин, бу һәқтики сөһбитимизниң тәпсилатини аңлайсиләр.

 
Пикирләр (0)
Share
Толуқ бәт