Tajikistandiki türkiye elchixanisi 3 Uyghurning ehwalini yéqindin sürüshte qiliwatqanliqini bildürdi

Tünügün türkiyide pa'aliyet élip bériwatqan sherqi türkistan ma'arip we hemkarliq jem'iyiti 3 neper Uyghur tijaretchining tajikistanda tutqun qilin'ghanliqi weqesini axbaratqa ashkarilighan idi.
Muxbirimiz shöhret hoshur
2011-01-21
Share

Muxbirimiz bügün bu munasiwet bilen tajikistandiki türkiye elchixanisigha téléfon qilip, 3 Uyghurning ehwali heqqide melumat soridi. Elchixana bayanatchisi mustafa türkel yilmaz, weqeni yéqindin sürüshte qiliwatqanliqini, emma tajikistanning téxiche weqe heqqide jawab qayturmighanliqini bildürüp mundaq dédi:

Biz bu weqedin 9-yanwar küni xewer taptuq؛ shu kündin bashlap, elchixanimiz tajikistan tashqi ministirliqidin melumat telep qildi. Bizning türkiye tashqi ishlar ministirliqimizmu, türkiyidiki tajikistan elchixanisidin melumat telep qildi. Emma, hazirghiche héchqandaq bir jawabqa érishmiduq. Biz bu heqte jawab élish üchün 10 kündin béri izchil halda heriket qiliwatimiz. 

Mustafa türkel yilmaz mesilini türk wetendashlirining bixeterlik mesilisi dep qaraydighanliqini, emma tajikistan tereptin éniq bir jawab almay turup weqe üstide pikir bayan qilmaydighanliqini hem weqeni sürüshte qilishni toxtatmaydighanliqini bildürdi. Biz bayanatchidin weqe seweblik tajikistandiki xitay elchixanisi bilen körüshken yaki körüshmigenlikini sorighinimizda, u "hazirqi basquchta, sürüshte qilish obyéktimiz, tajikistan tashqi ishlar ministirliqi" dep jawab berdi.

Türkiyidiki tajikistan elchixanisigha téléfon qilghinimizda, elchixanidiki nöwetchi xadim, alaqidar mes'ul xadimlarning nöwette ish ornida yoqluqini, özining weqedin axbarat arqiliq xewer tapqanliqini hem elchixanining bu tür mesililerge téléfon arqiliq jawab bérelmeydighanliqini bildürdi.

Türkiyidiki sherqi türkistan ma'arip we hemkarliq jem'iyitining mes'uli oghuzxan, tünügün türk téléwiziyiside qilghan sözide, mesile yalghuz 3 Uyghurning mesilisi emeslikini, ottura asiya we sherqiy jenubi asiyadiki döletlerdimu, Uyghur muhajirlarning oxshash mesilige duch kéliwatqanliqini bildürüp, türkiye hökümitini bu toghrida jiddiy heriket qilishqa chaqirdi. Oghuzxan yene, türkiye hökümitining Uyghur mesilisige melum mezgillik yaki weqe chiqqan chaghdila emes, dawamliq türde arilishishni, xitay bilen soda we diplomatik kélishimlerni tüzgende bu xil pursetlerni qachurmasliqini telep qildi.

Oghuzxan sözide islam döletlirinimu, sherqi türkistan mesilisigimu xuddi pelestin, chéchen we keshmir mesilisige köngül bölgendek köngül bölüshke chaqirdi.

Türkiyidiki istratégiye mutexessisi erkin ekrem, tajikistan bilen xitay arisidiki munasiwetning yéqinqi tereqqiyatini tilgha élip, bu 3 Uyghurning teqdirining heqiqeten endishe qilishqa tégishlik ikenlikini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet