Xitay ölkiliridin chiqqan zawut-karxanilar qeshqerdiki Uyghur déhqanlirini yerliridin ayrimaqta

U sözide “Bu ölkiler Uyghur aptonom rayonida xelq turmushi qurulush türlirini yuqiri ölchemde orundap, yardem bérilgüchi orunlarning tereqqiyatigha zor töhpe qoshti” dégen. Emma radi'omizgha ehwal inkas qilghan kishining éytqanliridin qarighanda, xitay ölkiliridiki zawut-karxanilarning Uyghur élidiki qurulush türliri Uyghur déhqanlirini bay qilish emes, eksiche ularni nan tépip yeydighan azghine yéridinmu ayrip qoyghan.

Shinjang xizmiti yighini échilip, Uyghur aptonom rayoni “Türler boyiche yardem qilish” nami boyiche 19 ölkige bölüp bérilgendin kéyin, bu ölkilerning Uyghur rayonida énérgiye, kan, pen-téxnika, qurulush qatarliq sahelerde Uyghur élige meblegh sélish türliri boyiche, herxil zawut-karxanilar Uyghur élige chiqip, qurulushqa bashlighan idi.

Shinjang xizmiti yighini échilghanliqining bir yilliqi mezgilide, Uyghur rayonidiki axbarat wasitiliride bu zawut-karxanilarning Uyghur rayonida türlük qurulush türlirini yolgha qoyup, zor tereqqiyatlarni qiliwatqanliqi, Uyghur élide ish imkani yaritiwatqanliqi künde dégüdek teshwiq qilinishqa bashlidi.

Tengritagh torida bérilgen xewerlerde, aptonom rayonning partkom sékrétari jang chünshyenning yéqinda xéylongjang, lyawning qatarliq ölkilerning rehberlirini kütüwalghanda qilghan sözide, bu 19 ölkining shinjangning halqima tereqqiyatigha köngül bölüp, xelq turmushini yaxshilawatqanliqigha minnetdarliq bildürgenliki xewer qilindi. Uningdin melum bolushiche yene, aptonom re'isi nur bekri yighinda qilghan sözide bu 19 ölkidiki türlük karxanilarni shinjangning énérgiye bayliqini échip paydilinishqa, shinjangning yéza igilik kespini zamaniwilashturush qurulushigha, qeshqer, qorghas alahide iqtisadiy tereqqiyat rayonini échish qurulushlirini zoraytishqa téximu aktip qatnishishqa teklip qilghan.

Meyli Uyghur aptonom rayonining axbarat wasitiliride bolsun, meyli radi'omiz igiligen melumatlardin bolsun, hazir herqaysi nahiye-yéza bazarlirini ichkiridin kelgen karxanilarning séliwatqan qurulushliri qaplap ketkenliki melum bolmaqta. Bizning yerliklerdin alghan inkaslirimizdin qarighanda, hazir yerlik hökümetler xitay ölkiliridin chiqqan bu zawut-karxanilarning xatirjem qurulush qilishigha shara'it yaritip bérish üchün déhqanlarning yerlirini tartiwéliwatqan bolup, kichikkine yérige tayinip jan baqidighan déhqanlar jan béqish menbesidin ayrilip qélishqa bashlighan. Qeshqer wilayitige qarashliq melum yézidiki bir kishi bu heqte özining körgenlirini inkas qildi.