Алий мәктәп сәвийисидики уйғур кәнт кадирлирини 'қош тилда тәрбийиләш ' ниң мәқсити немә?

Уйғур елиниң хотән вилайитидики мәлум бир қош - тил мәктипиниң оқуғучилири.

Бүгүн чәтәлләрдики уйғур зиялийлири зияритимизни қобул қилип, хитай һөкүмитиниң алий мәктәпни түгәткән оқуғучиларни йәнә 3 ай "қош тил"да тәрбийиләштики мәқсити һәққидә өз қарашлирини оттуриға қойди.

Хитайниң шинҗаң гезитиниң хәвиридин мәлум болушичә, бу йил уйғур аптоном районидики 12 вилайәт, област, шәһәрләрдә алий мәктәпни пүткүзгән уйғурларни асас қилған һалда, 5698 оқуғучи кәнткә келип ишләшкә орунлаштурулған. Хәвәрдә дейилишичә, улар хизмәт орниға бериштин бурун, үч ай "йеза хизмити билимлири" вә "қош тил" тәрбийисини күчәйтиш курсида тәрбийилинидикән.

Бүгүн чәтәлләрдики уйғур зиялийлиридин раһилә ханим һәм елшат әпәнди қатарлиқлар радиомиз уйғур бөлүминиң зияритини қобул қилип, хитай һөкүмитиниң уйғурлар зич олтурақлашқан йезиларға кәнт кадирлири қилип бәлгиләнгән, алий мәктәп мәлуматиға игә, әслидинла хитай тилида мәлум сәвийигә йәткән уйғур оқуғучиларни ишқа чүшүштин илгири, аталмиш"қош тил" дәп аталған хитай тилида йәнә 3 ай тәрбийиләштики һәқиқий муддиаси һәққидә өз қарашлирини оттуриға қойди.

Зияритимизни қобул қилған раһилә ханим, әслидинла хитай тилида мәлум сәвийигә йәткән бу оқуғучиларни йәнә 3 ай "қош тил бойичә тәрбийилиши" әмәлийәттә бир шәкилвазлиқ икәнликини, хитай һөкүмитиниң һәқиқий мәқсити әмәлийәттә, уйғур йезилириға йеңидин тәйинләнгән бу йеза кадирлириға йеза хизмитидә хитай тилини қобул қилдуруш икәнликини баян қилди.  

Раһилә ханим өз қаришини баян қилип, хитай һөкүмитиниң хитай тилида иш беҗиридиған бу йеза кадирлири арқилиқ, уйғурлар топлишип олтурақлашқан йезилардики уйғур деһқанлириға хитай тилини теңиш һәм шулар арқилиқ ахирқи һесабта уйғур тилини, уйғур мәдәнийитини уйғур йезилиридинму сиқип чиқириш мәқситигә йәтмәкчи икәнликини оттуриға қойди.

Америкидики уйғур зиялийси елшат әпәнди, хитай һөкүмитиниң алий мәктәпни түгәткән хитай тили сәвийиси әслидинла хели юқири болған оқуғучиларни бу хил тәрбийиләштики һәқиқий мәқсити, әмәлийәттә уйғурлар зич орунлашқан районларда ишләйдиған бу яшларға, хитай һөкүмитиниң ишғалийәт сияситини сиңдүрүш дәп көрсәтти.  

Зияритимиз ахирида раһилә ханим хитай һөкүмитиниң мәйли қандақ вастиларни қолланмисун, уйғурларни өз ана тилидин ваз кәчтүрүш, уйғур мәдәнийитини йоқитиветиш мәқситигә йетишиниң ундақ асан әмәсликини, чүнки өз миллитини сөйидиған уйғурларниң мәйли у деһқан болсун яки кадир болсун өз ана тилини, өз мәдәнийитини қоғдайдиғанлиқини тәкитлиди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар