Kaliforniyide ötküzülgen Uyghur medeniyet kéchiliki jeryanidiki söhbetler


2007-10-30
Share

27 - Öktebir bérkéliy uniwérsitétida ötküzülgen Uyghur medeniyitini tebriklesh pa'aliyiti. RFA Photo / Jume

27 - Öktebir bérkéliy uniwérsitétida ötküzülgen Uyghur medeniyitini tebriklesh pa'aliyiti shu küni kechqurun sa'et 6 de bashlinip kech sa'et 11 ler etrapida ayaghlashti.

Melum bolushiche, bu pa'aliyet bérkéliy shehiri etrapida we san fransiskoda melum derijide ghulghula qozghighan bolup, bu pa'aliyet we mezkur pa'aliyette tonushturulghan Uyghur medeniyiti we Uyghurlarning kimliki heqqide san fransiskodiki nopuzluq gézit san fransisko koronikol gézitide maqale élan qilin'ghan.

Uyghur sen'etkarlarning yuqiri sen'et mahariti mezkur pa'aliyetke téximu qaynaq tüs qoshti

Bérkéliy uniwérsitétida ötküzülgen Uyghur medeniyitini tebriklesh pa'aliyitining utuqluq bolushida alahide tilgha élishqa erziydighan ishlar ichide, dunyaning herqaysi jaylirida yashawatqan Uyghur sen'etkarlarning yuqiri sewiye bilen orunlighan her türlük sen'et nomurliri we bedi'iyliki intayin yuqiri güzel sen'et eserliri muhim orun tutidighan bolup, sen'etkarlar özining yuqiri derijidiki sen'et mahariti arqiliq mezkur pa'aliyetke téximu qaynaq we güzel tüs qoshti.

Hazir fransiyide étnik muzika ilmi tetqiqati bilen shughulliniwatqan muqeddes mijit orunlighan lerzan Uyghur usuli tamashibinlarning diqqitini alahide jelp qildi.

Uyghur ressami merwayit xanim: " Uyghurlarni tonushturushta herqandaq pursetni qoldin bérip qoyushqa bolmaydu"

Bu pa'aliyetke gérmaniyidin kélip qatnashqan sen'etkarlar ichide, gérmaniyide kop qétim güzel sen'et körgezmisi achqan we tonulghan Uyghur ressami merwayit xanimmu bar bolup, u eserlirini élip kélip Uyghur medeniyitining güzel sen'ettin ibaret yene bir yarqin wariyantini pa'aliyet qatnashquchilirigha namayan qildi.

Merwayit xanim özining shunche yiraqtin kélip bu pa'aliyetke qatnishishining sewebini chüshendürüp, Uyghurlarni tonushturush üchün meyli bir sa'et we meyli bir minutluq bolsun herqandaq pursetni qoldin bérip qoyushqa bolmaydighanliqini otturigha qoydi.

Rehime dolan: "özüm pexirlinidighan medeniyetni bashqilargha tonushturushni oylidim"

Pa'aliyet jeryanida melum sewenlikler sadir bolghanliqini emma pa'aliyetning omumiy jehettin utuqluq bolghanliqini otturigha qoyghan, bérkéliy uniwérsitétning oqughuchisi we mushu pa'aliyetni bash bolup orunlashturghuchilarning biri bolghan rehime dolan, pa'aliyetni orunlashturush jeryanida yoluqqan herxil mesililerge qarimay, axirghiche berdashliq bérip pa'aliyetni wujudqa chiqirishqa seweb bolghan amilning néme ikenlikige jawab bérip "eqelliysi Uyghurning kimlikini Uyghur medeniyiti arqiliq amérika xelqige tonutush" dep jawab berdi.

Alim séyitof: "Uyghur élini shinjang dep atash bir nomussizliq"

Amérika Uyghur birleshmisining bash katipi alim séyitofmu mezkur pa'aliyetke qatnashqan bolup, u, gerche bu pa'aliyet jeryanida bezi sewenlikler sadir bolghan bolsimu, pa'aliyetning omumi jehettin yaxshi keypiyatta élip bérilghanliqini otturigha qoydi.

Emma u yene, pa'aliyet jeryanida sadir bolghan atalghu jehettiki xataliqlargha izahat bérip, Uyghur élini " shinjang" dep atashning tarixi jehettin xata bolidighanliqini we buning bir nomussizliq ikenlikini tekitlidi. Alim séyitof yene, eger bundin kiyin élip bérilidighan mushu xildiki pa'aliyetlerge amérika Uyghur birleshmisi yéqindin közitish élip barghandin sirt, meyli qaysi jehettin bolsun öz yardimini ayimaydighanliqini otturigha qoydi.

Doktur liliyan: "biz birmu bayraq asmiduq, chünki biz bir döletni emes, belki medeniyetni tebrikleymiz"

Uningdin bashqa, bu pa'aliyetke qatnashquchilarning biri bolghan, hazir kaliforniyide yashawatqan adil atawulla ependi bu pa'aliyetning utuqluq bolghan tereplirining birini héch bolmighanda 27- öktebir élip bérilghan pa'aliyetning san fransisko jama'iti arisida diqqetke sazawer bolghanliqini we san fransiskoda chiqidighan gézitlerdin orun alghanliqini bildürdi hemde pa'aliyette sadir bolghan mesililer üstide toxtilip, shu xildiki mesililerning sadir bolushigha seweb bolghan nersining pa'aliyet orunlashturush jeryanining bashqa Uyghur jama'itige melum jehettin mexpiy tutulghanliqidin bolghan dep körsetti.

Bu pa'aliyetni emelge ashurushta iqtisadi we bashqa jehetlerdin yéqindin yardemde bolghan bérkéliy uniwérsitéti xelq'araliq oqughuchilar bashqarmisining bashliqi doktur liliyannng bildürüshiche, mezkur pa'aliyet intayin utuqluq élip bérilghan bolup, kelgüsidimu yene mushu xildiki Uyghur medeniyiti pa'aliyetlirini köplep orunlashturidiken.

Doktur liliyan yene, özining bu yerde bir döletni emes, belki medeniyetni tebrikleydighanliqini tekitlep: "biz bu yerde birmu bayraq asmiduq, chünki biz bu yerde bir döletni emes, belki medeniyetni tebrikleymiz" dep otturigha qoydi. (Jüme)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet