Рабийә қадир ханим: хитай уйғур пидаийларни радикал йолға мәҗбурлаватиду

Дуня уйғур қурултийи 4 уйғурға берилгән өлүм җазасиға қарита инкас қайтуруп, хитай һөкүмитиниң болуп өткән аччиқ вәқәләрдин савақ алмайватқанлиқини әйиблиди.
Мухбиримиз шөһрәт һошур
2011.02.23
Rabiye-Urumqi-PressClub-305 Рабийә ханим, үрүмчидә йүз бәргән 5 ‏- ийул намайиши қанлиқ бастурулғандин кейин, америка дөләтлик ахбарат кулубида, 2009 - йили 20 - ийул, 2 - қетим мухбирлар күтүвелиш йиғини чақирип, 5 ‏- ийул намайишиниң қанлиқ бастурулғанлиқи вә хитайниң мәтбуатлардин немини йошуруватқанлиқини тоғрисида мәлумат бәрди вә мухбирларниң суаллириға җавап бәрди.
RFA Photo

Хитай ахбарат васитилири бүгүн, хитай алий сот мәһкимисиниң 4 нәпәр уйғур мәһкумға берилгән өлүм җазасини тәстиқлиғанлиқини хәвәр қилди. Дуня уйғур қурултийиниң рәиси рабийә қадир ханим, бүгүн бу һәқтә радиомизға баянат берип, хитай һөкүмитиниң болуп өткән аччиқ вәқәләрдин савақ алмайватқанлиқини әйиблиди. Рабийә ханим баянатида йәнә, хитайниң тохтавсиз өлүм җазалири арқилиқ уйғур пидаийлирини радикал қаршилиқ йолиға мәҗбурлаватқанлиқини оттуриға қойди.

Хитай өлүм җазалири арқилиқ муқимлиқни сақлаш тәдбирини давамлаштурмақта. Уйғур миллий һәрикитиниң рәһбири рабийә қадир ханим, бүгүн бу һәқтики баянатида, уйғур елидә растинила муқимсизлиқниң мәвҗут икәнликини, бу муқимсизлиқниң хитай ишғалийити билән тәң башланғанлиқини, йүз бериватқан вәқәләр муқимсизлиқниң сәвәби әмәс, бәлки нәтиҗиси икәнликини билдүрди.

Хитай һөкүмити бастуруш арқилиқ уйғурларниң миллий ирадисини бойсундурушқа тиришмақта. Рабийә ханим болса, бу тәдбирниң йеңи бир тәдбир әмәсликини, бу тәдбирниң муқимлиқ үчүн ишқа яримайдиғанлиқи аллиқачан испатлинип болғанлиқини; шуңа хитай һөкүмити растинила, әбәдий әминликни халиса, зораванлиқтин ваз кечиши вә уйғурларниң авазиға қулақ селиши керәкликини йәнә бир қетим тәкитлиди.

Йеқинқи йиллардин бери уйғур пидаийлири көпинчә һалларда, хитайниң әскири қисимлири, сақчи органлири, һөкүмәт әмәлдарлири қатарлиқ дөләт аппаратлирида вәзипә өтүватқанларға һуҗум қиливатқан болсиму, йәнә бәзи чағларда, хитай пуқралириму һуҗум нишани болмақта. Рабийә ханим бу һәқтә тохтилип, хитай һөкүмитиниң уйғур хәлқи билән хитай хәлқи арисиға өч ‏- адавәт уруқи чачқанлиқини, шуңа вәқәләрдә өлгән пуқраларниң әсли җавабкари хитай һөкүмити икәнликини әскәртти.

Һөрмәтлик радио аңлиғучилар, рабийә ханимниң қаришичә, уйғур йезилирида терилғу йәрләр хитайларниң қоллириға мәркәзләшмәктә. Һөкүмәт органлири вә завут-фабрикиларда ишләш пәқәт аз сандики уйғурларға несип болмақта. Йилиға йүзләп, миңлап уйғур яшлири хироинниң зиянкәшлики билән һаятидин айрилмақта вә бу паҗиәниң давамлишишиға хитай һөкүмити көз юмуп турмақта. Шуңа мана мушундақ вәзийәттә яшаватқан кишиләрни өлүм җазаси арқилиқ тәһдит селиш карға кәлмәс бир тәдбирдур.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.