15 - Noyabir türmidiki yazghuchilar künide xelq'ara Uyghur qelemkeshler jem'iyiti bayanat élan qildi

Bügün Uyghur qelemkeshler jem'iyitining londundiki xadimi eziz eysa ependi radi'omiz ziyaritini qobul qilip, bu qétimqi bayanatida, xitay türmiside yétiwatqan Uyghur qelemkeshliridin muxbir gheyret niyaz we tor bashqurghuchisi gulmire iminning ehwali heqqide tor bétide bayanat élan qilghandin bashqa, mexsus doklat teyyarlap, xelq'ara qelemkeshler jem'iyitining herqaysi döletlerdiki tarmaq teshkilatlirigha yollighanliqini bildürdi.

Xelq'ara Uyghur qelemkeshler jem'iyitining 2012 - yilliq türmidiki Uyghur qelemkeshliri heqqide élan qilghan bayanatida 2009 - yilidiki “5 - Iyul ürümchi weqesi” sewebidin qolgha élinip, 15 yilliq qamaq jazasigha höküm qilin'ghan muxbir gheyret niyaz we muddetsiz qamaq jazasigha höküm qilin'ghan tor bashqurghuchisi gülmire iminning ehwali tepsiliy bayan qilinip, xelq'ara teshkilatlarni 5 - iyul weqesidin kéyin qolgha élin'ghan 20din artuq Uyghur tor bashqurghuchiliri we tor yazarlirining türmidiki ehwalini xitay hökümitidin sürüshtürüsh we türmidiki Uyghur yazghuchiliri üchün adalet telep qilish murajet qiln'ghan.

Xelq'ara Uyghur qelemkeshler jem'iyitining londundiki xadimi eziz eysa ependi radi'omiz ziyaritini qobul qilip, bu yilliq “15 - Noyabir türmidiki yazghuchilarning heq - hoquqlirini qoghdash” heqqidiki bayanatning 5 - iyul weqesi sewebidin qolgha élin'ghan 20 - din artuq wijdan mehbusigha béghishlan'ghanliqini bildürdi.

Eziz eysa ependi xeklqara Uyghur qelemkeshler jemiyiti qurulghandin buyan türmidiki Uyghur yazghuchilirining ehwalini igilesh we dunyagha anglitish jehette tirishchanliq körsitip kéliwatqanliqini bildürdi.

Eziz eysa ependi sözide, 2011 - yilliq türmidiki yazghuchilar küni bayanatining “Yawa kepter” namliq eser sewebidin 15 yilliq qamaq jazasigha höküm qilin'ghan nurmemet yasin'gha béghishlan'ghan bolsa, bu yilliq bayanatta nuqtiliq halda, muxbir gheyret niyaz we tor bashqurghuchi gülmire iminning ehwali heqqide mexsus doklat teyyarlinip, bu doklatning xelq'ara qelemkeshler jem'iyitining 147 dölettiki shöbe tarmaqlirigha yollinip, ulardin xitay hökümi'itige bésim ishlitish telep qilin'ghanliqini bildürdi.

Eziz eysa ependi yene 2012 - yilliq 15 - noyabir türmidiki yazghuchilarning heq - hoquqlirini qoghdash künide xelq'ara qelemkeshler jem'iyiti qarmiqidiki xitay qelemkeshler jem'iyiti we xelq'ara qelemkeshler jem'iyitining bashqa shöbiliriningmu “Türmidiki yazghuchilarning heq - hoquqlirini qoghdash heqqidiki bayanati”da xitay türmiliride yétiwatqan Uyghur yazghuchilirining ehwalini tilgha élip,xitay hökümitidin bu wijdan mehbusliri üchün adalet telep qilghanliqini bildürdi.

Ziyaritimiz axirida eziz eysa ependi yene, xelq'ara Uyghur qelemkeshler jem'iyitining bundin kéyinki xizmetliri heqqidimu toxtaldi. Eziz eysa ependi sözide türmidiki Uyghur yazghuchilirining ehwali heqqide uchur igilesh, ular üchün adalet telep qilish hem xitay hökümranliqi astida erkin pikir qilish imkaniyiti tartiwélin'ghan Uyghur yazghuchiliri uchrawatqan türlük bésimlarni dunyagha anglitish xelq'ara Uyghur qelemkeshler jem'iyitining asasliq xizmet nishanliridin biri ikenlikini alahide tekitlidi.