Yawropada igilik tikligen Uyghurlar-“Yipek yoli tiz tamaqxanisi”

Iqtisadi riqabet keskin bolghan yawropada köchmen milletlerge nisbeten igilik tiklep qed kötürüsh köp tirishchanliq telep qilidu. Bolupmu, yémeklik saheside özining milliy ta'amlirigha adetlen'gen yerlik xelqni ulargha gheyriy bolghan ta'amlargha jelp qilish asan emes. “Yipek yoli tiz tamaqxanisi”ning xojayini iliyar ependi bu jehette netije yaratqan Uyghurdur. U, etrapidiki 10 din artuq chong tiptiki gherb ta'amliri réstoranliri arisida qed kötürüp turalighan, yeni yerlik xelqler bilen bolghan keskin riqabette utup chiqalighan kishilerdin biri. Uning qol astida ishlewatqan bir Uyghur kishi “Yipek yoli tiz tamaqxanisi”ning barghanséri ronaq tépiwatqanliqini tilgha aldi.

RFA/Ekrem

Biz ziyaritimiz dawamida, iliyar ependining kishini qiziqturidighan üch ishini bayqiduq. Buning biri, italyanche, türkche, Uyghurche ta'amlarning artuqchiliqidin paydilinip, gérmanlar yaqturidighan temdiki yéngi ta'amlarni keship qilishi. U keship qilghan ta'amlar köpligen gérman xéridarlarning alqishigha ériship, kündilik muqim xéridarlarning sanini köpeytip, igilikining ronaq tépishigha türtke bolghan.

Ikkinchisi, “Yipek yoli tiz tamaqxanisi”ning ta'amlirini pütün Uyghurlar üchün heqsiz qilishi. Yalghuz gérmaniyidiki Uyghurlar üchünla emes, dunyaning her yéridin seyle-sayahet bilen kelgen Uyghurlargha bu dukanning ta'amliri heqsiz bolup kelgen, hetta özbék, türk, qazaqlarmu bu dukanning eziz méhminigha aylinip, heqsiz ta'amlar bilen kütülgen.

Üchinchisi, öz qérindashlirigha qilghan xeyri-ihsanlirini sir tutushi. Iliyar ömer ependi özi yalghuz yaki bashqa wetendashliri bilen birliship weten ichi-sirtidiki köpligen mohtajlargha xeyrxahliq qilghan bolsimu, bu himmetni ashkarilashni xalimighan. U ziyaritimiz dawamidimu bu toghriliq pikir bayan qilishni ret qildi.

Biz üchün téximu diqqetke sazawer bolghini؛ iliyar ependining chong oghli iptixarni gérmaniyidiki aliy bilim yurti bolghan téxnika uniwérsitétida oqutalighanliqidur. Yerlik gérman perzentlirimu nahayiti teste kireleydighan bu aliy téxnika mektipige oghlining ela netije bilen oqushqa kirelishi, iliyar ependi a'ilisining köp pul tapqandinmu artuqraq xushalliqi bolup qalghan.

Töwende “Yipek yoli tiz tamaqxanisi”ning xojayini iliyar ömer ependi bilen élip barghan söhbetning tepsilatini anglaysiler.